Abasiramu omwihanga rya Uganda batwire nibeshegyereza mukuru weihanga kwabikiriza bakatandiikaho banka yobusiramu. Nikimanywa ngu omu Uganda harimu Banka hamwe na Sacco nyingi, kwonka omuryezo zoona habaire hatarimu ezabasiramu nkoku turikureba ezamadiini agandi.
Bwanyima ya puresidenti kuhurikiriza okushaaba kwabo okutwireho kumara obwire bwingi, arugireho yigura omubutongore banka yabasiramu erikumanywa nka Salaam bank. Salaam bank egi aine eitagi ryayo kuruga omwihanga rya Djibouti erikuru eraije kuguma nirishwijuma emikorere ya banka egi omu Uganda.
Omukoro gwokutongoza banka egi gukakorerwa omu kishayi Kololo ahu mukuru weihanga puresidenti Museveni yabaire ari omugyenyi mukuru. Puresidenti Museveni asiimire abasiramu ahabwokwehayo bakareta banka eraije kwongyera amani abasiramu kyahiika omubyobushubuzi. Oijuke ngu abasiramu omwihanga rya Uganda nibakora ebicweka 14% aha mubaaro gwabanya Uganda.
OKWERAIJE KUHWERA ABASIRAMU KWETUNGURA
Kurugirira omu biragiiro byabasiramu ebikwatiraine na banka egi eya Salaam bank, omusiramu weena orikwihayo sente ninga orikubiika omu banka egi tarikwikirizibwa kushashura ninga okwakiira amagoba ga sente ezarikuba aihireyo. Banka yabasiramu egi neikiririza omu kubagana amagoba.
Banka zediini yobusiramu omunsi yoona nizita amani aha kwiha amagoba kuruga omubyobushubuzi obwe barikugyendera aha mateka gobusiramu. Eki nikimanyisa ngu abasiramu abari omubyobushubuzi omwihanga rya Uganda nibaija kuhwerwaho munonga kutunga sente zokushubura ezitarimu kutamu amagoba.
Eki nikimanyisa ngu bank yobusiramu egi neija kuba yagiira omutano gwamani aha banka ezindi eziri omwihanga ahu zirikwihaho amagoba ahari baka sitoma babo abarikweguza sente omu muringo ogwa za rooni.
