Dr. Kiiza Besigye omwe omubatandikireho ekibiina kya FDC obwahati ariyo nayetorora eihanga arikwebuza aha bahagizi bekibiina kya FDC ekibashemeraire kukora kwenda kutwara obwebembezi 2026.
Omurutayayo rwa Besigye omubicweka ebya Mbarara, Rukungiri,Kabale hamwe na Busoga, abahagizi abekibiina kya FDC hamwe nabo abarikuhagiira Besigye nkomuntu, bamwakiire nokushemererwa kwamani barikumworeka obuhagizi.
Eki kiretiire baingi basigara barikwebuza yaaba Besigye ariyo nagaruka kwenda kwesimba 2026. Dr.Kiiza Besigye arikuganiraho nabahagizi omukibuga Mbarara aborekiire oku ataine kuriinda 2026 kwihaho puresidenti Museveni kureka batandiikire.
Oijuke ngu ekibina kya FDC kikagiramu obutikirizingana ahu obwahati hariho ekibaju ekya Najja nakumbi hamwe nekya Besigye ekya Katonga. Ebi bikaija kubaho bwanyima ya besigye kutunga akakumu abebembezi bekibiina kya FDC abarimu Nandala Mafabi hamwe na Patrick Amuriat bwanyima yokuremwa kushoborora ahu bihire sente yamwigi.
Besigye obwe ashagatirwe owabaire ari ceyamani wekigombe Wasswa Birigwa, Mwijukye Francis, hamwe nabandi nibagyenda barikubuza abahagizi aha nshonga zokugaruka omu kibiina ekya FDC ninga okutandikaho ekisya.
Ori omuhandiki wekigombe kya FDC ekya Katonga Horold Kaija naagira ngu nobu harabe harimu obutikirizingana oburetiire ekibiina kya FDC kyasisikara, kwonka baine nkabebembezi kandi abarikukunda FDC baine amani ngu ekibiina nikiza kugumaho.
Naagira ngu nibaija kusharamu ekyahamuheru kubaraheze kwetorora eihanga obwe barikubuza hamwe nokuhurikiriza ebitekateko byabahagizi.
Ekibuzo ekirikusigara aha mitiima yabantu boona abari omukibiina kya FDC hamwe nabo abarikukunda Besigye nkomuntu nangwa naabo abari omu bibina byobutegyeki ebindi nka NRM, NUP, UPC hamwe nebindi.
Nibebuza Besigye yaaba akiine amani nka aguyabaire aine omu 2005.Okwija kwa Besigye nikuza kusiga nkahi ekibiina kya FDC ekirikwebemberwa Patrick Amuriat hamwe nabandi , Besigye kuyakusharamu ngu batandikye ekigombe ekyabo nikiza kugira amani ninga?
