WEBARE KUBA EMANZI – MUSEVEN ASIMIRE AMAMA MBABAZI AHA MUKORO GW’OKWIJUKA EMYAKA 50 OMU BUSHWERE
Owabaireho enganzi eihanga John Patrick Amama Mbabazi asimire omukazi we Jacqueline Mbabazi ahabw’okumuberaho kandi akatungura eka kumara emyaka 50 kuruga nibatandiika obushwere bwabo. Mbabazi obwahati oine emyaka 75 y’obukuru kandi omukyara we Jacqueline Mbabazi oine 69 bijukiire emyaka 50 bari omu bushwere kandi omukoro gubaire aha hoteri ya Serena Kampala.
Aba ebiragano by’emyaka 50 babikorire aha All saints Cathedral omuri Kampala ahu ishabarebereezi w’ekanisa ya Uganda Dr. Stephen Kaziimba Mugalu ayebembire omukoro gw’okujweka empeta aba omurundi ogwakandi.
Akiibishopu Kazimba abashabire kuguma nobwesigwa hamwe namaziima nibyo biraije kubagumya bari abahanguzi. Naagira ngu abamwe nibatera ebiragano kwonka aha mitima yaabo nibaba bijwire obugobya hamwe nobutendezana.
Omukoro ogu guhikireho ebikogi byamani kuruga omu gavumenti bebembirwe sipiika weishegyero Thomas Tayebwa,omudumizi wamahe Gen Kainerugaba, Dr Ruhakana Rugunda ori munywani wa Mbabazi kuruga omu buto, hamwe nabandi baingi otebirwe abagainga bomuri Kampala.
Mukuru weihanga Yoweri Kaguta Museveni obaire ari omugyenyi mukuru hamwe na Janet Kataha Museveni aha mukoro ogu, asimire Amama Mbabazi hamwe nomukaziwe Jacqueline ahabwomurimo muhango ogu bakorire eihanga rya Uganda namunonga ekibiina kya NRM.
Puresidenti Museveni agambire abantu okuyabugaine Mbabazi omu myaka ya 1970 obu yabaire ari omu omurugamba rw’okuzahuura eihanga. Museveni naagira ngu omu mwaka gwa 1974 obwe ari omwihanga rya Kenya omukibuga Nairobi nibwe amanya Mbabazi nkomuntu owabaire nakunda ebyobutegyeki ari ahitendekyero erya Makerere.
Museveni naagira ngu Mbabazi akikiriza kuza omu kampu ye oyokuzahura eihanga ahu yabasize kureta abandi abarwani 28 ababegisireho obwe arikukwatanisa na Gen Kahinda Otafire. Nkomuringo gumwe gwokubasiima mukuru weihanga abahaire ente 20 kwongyera aha zibaine.
Amama Mbabazi agambire okubyabaire bitorobi omu bwire obuyatungiremu omukazi we Jacqueline omu mwaka gwa 1974 obu babaire bari omurutaro rwokwihaho Ida Amini.Naagira ngu omukyara we akagumira embera eibabaire nibarabamu obwire obwo nokuhisya nahati ebibaragaine tibikahindukaga. Nikwe kusiima mukuru weihanga ahabwokumushagiika kandi akaba nawe kuruga nibaruga omukishaka nokuhisya nahati.
