OKWONGYERA OMUTINDO AHA MWANI OGURIKUGUZIBWA AHERU EIHANGA
Fakitore y'okubanza omwihanga erabe neyongyera omutindo aha mwani eyombekirwe Ntungamo


Nkomuringo gumwe gwokuta omunkora ebiragiiro bya mukuru weihanga aha kwongyera omutindo ahabyobuhingi noburiisa ebirikushohora aheru eihanga, obwahati amakorero gatari gamwe nagamwe gariyo nigatandiika kandi eki kiriyo nikyongyera ebyobushubuzi omwihanga.
Ahuturikugambira ebi omu Disiturikiti ya Ntungamo, ekyoma ky’omwani ekiri aha mutindo gwensi yoona kiriyo niky’ombekwa omu tauni kanso eya Rwashamaire omuri Kajara, nikyo kyoma kyomwani ekyokubaza omwihanga. Fakitore egi neija kuba nekora ebintu byingi ebirikuruga omu mwani ebirimu; Kaawa eri ahamuntindo gwensi yoona, amajuta hamwe nebintu byingi ebirikuruga omu mwani.

Dr Monica Musenero arikurambura fakitore egi asiimire omurimo oguriyo nigukorwa ahabw’okuba ebi mukuru weihanga arikwenda obwahati biriyo nibikorwa. Naagira ngu fakitore eki erikumanywa nka ISPIRE AFRICA niyo fakitore yokubanza omwihanga arabe neeta omutindo aha mwani. Eki nikimanyisa ngu abahingi b’omwani omu buregye rwaizoba hamwe na Uganda yoona nibaija kuganyirwamu munonga.
Sam Mucunguzi ori ceyamani wa Disiturikiti ya Ntungamo naagira ngu ogu nomugisha muhango kureeba ngu Fakitore egi bagiresire omuri Ntungamo. Nayoreka oku erikwija kuyamba abantu ba Ntungamo ahabwokuba nobu bariyo nibagyombeka abakozi barikurenga 100 kuruga omuri Ntungamo batungire emirimo.
Sam Mucunguzi nayenda abahingi b’omwani omuri Ntungamo bongyere amani omukuhinga omwanai ahabw’okuba fakitore egi neija kuba neshohoza omwani mwingi ogurikurenga omu nshaho Miriyooni 21 buri mwaka.
Fakitore egi obwahati yahiika aha bucweka 75 omukwombekwa kandi omwaka ogu gwaza kuhwa neija kuba yahwire kandi erikushohoza purodakitisi ezirikuruga omu mwani.