MUTANDIKYEHO EMIRIMO YETUNGUKA- HON RITAH BWAHIIKA ASHABIRE ABAKYARA BA RUHARO WODI KUTANDIKAHO EBIGOMBE BYOKWETUNGURA
Abakyara baine kwetandikiraho emirimo erikubahereza sente zokutungura amaka gabo
Omukyara orikwebembera abakyara omwishengyero ahabwa bwekibuga kya Mbarara Hon.Ritah Bwahika nayenda abakyara abari omu Kibuga Mbarara batandikyeho emirimo yetunguka kutari kusiba bategyeraize abashaija babo kubahereza buri kimwe.
Ebi abigambire aha mukoro gwokujaguza ekiiro kyabakyara omu wodi eya Ruharo, omukoro ogukworirwe ahishomero rya Ruharo Infantry primary school. Bamwe abetabire aha mukoro ogu habaire harimu Hon.Dr. Rukari, Meeya Gumisiriza Kyabwisho , orikujwekyera aba Mbarara city North, Hon. Molly Asimwe owa Rwampara, Bonny Kashaija owabaire ayesimbire na Ritah bwahiika, Rutaba, Tweheyo James orikukora omu offisi ya puresidenti, Bakansara abarikujwekyera ebyanga byekibuga Mbarara, Charity Kibaju orikwenda kwesimba, hamwe nabandi bakyara abaine emirimo etaryemwe nemwe omu kibuga kya Mbarara.
Abakyara abarikwegitira omu bigombe bitari bimwe nabimwe borekire ebibarikukora hamwe nokubabasize kukwatiraho amaka gaabo omu byetunguka. Dr. Rukari ohikire aha mukoro ogu ashabire abazaire okukora ekirikubasika kureba ngu babangura abaana babo omu mirimo etaryemwe nemwe ahabwokuba omurembe guriyo nigubatwara omu gihena.
Nikwe kushaba abantu kwihaho obwangane obutarimu entunguka kureka okukwatanisiza hamwe bakakorera entunguka. Bimwe aha bigombe byabakyara ebirimu ekya Ruharo ushering and catering service batungire sente zetandikwa kuruga owa Hon. Molly Asiimwe obahaire emitwaro 20 hamwe nezindi ezirugire owa Hon. Rukari hamwe na Ritah Bwahika.
Ritah Bwahika obaire ari omugyenyi mukuru aha mukoro ogu asimire abakyara ahabwokwehayo bakatandikaho ebintu ebirikureta entunguka. Naagira ngu okubiika sente zaka bokisi reru omwaka gukiba niguhwa bakabagana sente zokurya aha kiro kikuru nekintu ekitahikire. Nayenda abakyara boona batandiikye kukwatanisa nabashaija babo okuretaho entunguka.
James Tweheyo orikukora omu offisi ya mukuru weihanga agambire abantu oku arikuza kukora okucoondoza aha puroguramu eya parish development modal ei arikugira ngu abantu abashemerire kuganyirwa omu puroguramu egi tibo baganyirwemu omuri Mbarara. Aha niho ashabire abanya Mbarara kandi akabamanyisa oku Puresidenti Museveni arikwija kwesimba omu karuru aka 2026, mbwenu abanya Mbarara baine kuterera NRM nkaburaijo.
