ENTARO ZAMATAKA OMURI BUHWEJU OMUNYISHENGYERO,MWIJUKYE BAMWASIRE OMUTWE
Nayenda mukuru wa poriisi omwihanga atahe omushonga ezi ahabwokuba abantu bahwaho
Abantu abatarikumanywa batahirire ekereziya ya Rwanyamabare erikushangwa omu parish eya Butare omuri Buhweju batera abikiriza eizoba rya sande nangwa nabamwe batunga obuhuta
bwamani otiremu nomunyishengyero wa Buhweju Hon Francis Mwijukye ou basire omutwe.
Abikiriza aba babandize nokushaba nabwanyima nikwe kugiraho orukiiko omunda yekereziya nekigyendererwa kyokureba oku batunga oburinganiza ahitaka eribamazireho emyaka myingi kwonka omuntu omwe orikumanywa nka Edwin Burimbare nayenda kuritwara . Omunyishengyero
Mwijukye Francis nomwe omubabaire bari omurukiko oru rowkureba okubakubasa
kuhwera abantu aba.
Nabwanyima y’okumarira orukiiko oru abantu abatarikumanywa ababaire bajwire ebirikwiragura batahirire abikiriza aba otiremu nomunyishengyero Mwijukye nikwe kubakomera enkoni ezitakabahoga ekirugiriremu omunyishengyero kwatika omutwe.
Hon Mwijukye ou twashanga aha kitanda ahirwariro rya Divine Mercy Rwebikona omu kibuga Mbarara ari omumbera etarikwerarikiriza yatugambira oku ahonire rufu bwanyima yabatuura kumuhwera bakamutasya omukereziya hamwe na poriisi eizire ekamuhwera.
Mwijukye naagira ngu ebi byoona kubaho birugirire aha nshonga zitaka ahu rooya orikumanywa nka Edwin Burimbare ariyo nayenda kutwara eitaka ryabatura otwariremu ekereziya. Ekintu eki Mwijukye naagira ngu tikiraije kubasiika ahabwokuba abantu aba batwire ahitaka kumara emyaka
erikurenga omuri 100 kandi nabwe kuryakubaire ritari ryabo Edwin orikumanya ebiragiiro ashemeraire kuza omu kooti. Kutari kureta emihiri ekatera abantu abamwe obwahati abari ebimuga.
Orutaro oru omunyamakuru waitu orikushaka amakuru omu disiturikiti ya Buhweju Juliet Kyarisiima nawe arugyendiremu bwanyima yabinazi kumureba nakwata ebishushani bakamutera nabwanyima bakatwara kamera na kopyuta eyabaire nakoresa.
Obwahati omunyishengyero Mwijukye naagira ngu nobu barabe bamutiire taraije kurekyeraho kurwanirira abantu be ahabwokuba obushomankuzi bwamataka buregyeserize. Nayenda mukuru wa Poriisi hamwe na kooti kubataha omunshonga ezi eziriyo nizitwara amagara gabatuura.
Omugambirizi wa poriisi ya Uganda Fred Enanga yahamya amakuru aga obwe arikugira ngu omushaija orikumanywa nka Frank Kamugisha ishe wa Edwin Burimbare niwe atwire nahaya okwarikuza kushenya ekanisa erihaihi namaka ge obwe arikugira ngu eitaka nerye. Enanga naagira ngu Kamugisha abaire aine abakozi abarugireyo bakateera abikiriza. Obwahati poriisi eriyo nekora okucoondoza.
