OKUKORESA ENKOZI ZEBIBI  NOMURINGO GUMWE GW’OKUMARAHO EMIHONDANO YAMATAKA OMU UGANDA?

OKUKORESA ENKOZI ZEBIBI  NOMURINGO GUMWE GW’OKUMARAHO EMIHONDANO YAMATAKA OMU UGANDA?

Hon. Mwijukye Francis

Obwe kiri aha kitanda kutunga obujanjabi oburikumara ngu obundi nkahona, nahandiika ebaruuha egi ndikuhandikiira Poriisi hamwe nebindi bitongore by’okwerinda, nekigyendererwa ngu obundi hakabaho obusigye aharyabo abanya Uganda abarikubona boona Ahabwe nshonga z’amataka.

Nkoku murikukimanya ngu obwahati ndi omwirwariro bwanyima yokuterwa abantu abu babaire batumire ahizoba rya sande ebiiro 12/05/2024 aha kereziya eya St Jude Rwanyamabale omu Disiturikiti eya Buhweju. Okuntema nomuhoro aha mutwe hamwe nokuntera ebiiti ebyabaire  birimu emisumari, kwonka nkahona buzima kukaba kuri okukunda kwa Mukama ngu mbe nkiriho obundi ngambe ebyabaireho.

Ekyokubanza, nkomunyishengyero ndi memba aha kakiiko kebyetaka aha bwa  Butare catholic parish, nahabwekyo St. Jude Rwanyamabare catholic church eri ahansi yobutegyeki bwekereziya  ahu ndikushutama nkomwe ahabebembezi abarikwebembera akakiiko kebyitaka.

Ekereziya eibarikugamba yamara emyaka myingi ahitaka eryo. Eitaka eryo eribakutonganira ririmu eishomero, abatuura, emisiri yamajani, omwanya ogubarikutahamu amaizi hamwe namaka maingi.

Eri niryo eitaka eri Frank Kamugisha hamwe nomutabani Edwin ori rooya barikugiira ngu neryabo ekirikuretera bahenda ebirangiro obwe barikubingamu abantu. Nobu barikugira ngu eitaka neryabo, tibaragire mu kooti ngu batungye oda ya kooti yokubinga abntu abo omwitaka eryo, kureka bakwata bazitira eitaka eryo  nekigyendererwa kyokuzibira abikiriza obutagaruka kuraba omwitaka eryo baba nibaza kushaba, abeegi barikuza ahishomero,nangwa nabatuura okukoresa eitaka ryabo nkoku bashemerire.

Kwenda kuhikiriza ekyabo, Edwin Burimbare akareta bakanyama abatarikumanywa omu kyanga yabatwara omuka ye eri haihi nekereziya. Ekyokutangaza bakanyama aba tibarabajwire omukyaga nowa ceyamani.

Barikuza kunteera eizoba rya Sande, bakanyama abo bakaba baruhize abantu barikubateera namunonga abo ababaire bagyezaho kuza omwitaka eryo.Tibakomire aha kuteera abantu kwonka kureka nikigambwa ngu nokuhamba abakazi abubarikukwatira omwitaka eryo.

Aha biiro 11/05/2024 ceyamani wekyaro hamwe naba Kansara bakagyezaho kutaaha omushonga zitaka eryo kwonka bakanyama bakabakwata babatera  ekyaretiire abatuura bayesharinga, nikwe kweta Poriisi ekabitahamu. Ekyokutangaza kandi ekirikunshasha nokushanga ngu Poriisi eizire kuyamba abatuura niyo yagarukiire ekabinga abatuura ababaire berundine aha kereziya barikujunana bakanyama abo ahabwokuhamba abaana babo hamwe nokubateera.

Obu Kamugisha yabaire ataine kiragiro kyoona kya kooti Poriisi ekaba etashemerire kuba neza aha rubaju rwe ekamuhorereza nkowakora ekihikire omumwanya gwokuhwera ekanisa.

Bwanyima ebi byoona kubaho, abebembezi bekereziya bakanyeta ngu nyije nshabe nabo, nangwa batekateka ngu okushaba oku tikuraije kubaho ahabwokumanya ngu nibaza kubazibira, kwonka ekyomugisha omurungi nkahiika aha mwanya nashaba naabo nobu barabe babaire batinire.

Bwanyima yokushaba aha shaaha ikumi zomwazo (4:00pm) kutwabaire turi aheru yekereziya, bakanyama abu babaire baresire bakaruga omuka ya Kamugisha eri haihi nekereziya, bakwise emihoro hamwe nebiti birimu emisumari nikwe kutandiika kuteera abantu. Omuryabo hakaba harimu omunyamakuru wa Tv West Juliet Kyariisima ou batiire bakashisha camera obwe otebirwe nokutwara kupyuta ye hamwe na camera. Abantu barikurenga ikumi bakatunga obuhuta bwamani otwariremu nanye okiri omwirwariro.

Kunagyerizeho kutaha omunshonga bakanyama babiri bakahika haihi nahunabaire ndi bakwise emihoro hamwe nebiti. Nkatekateka ngu bakaba nibenda kugamba nanye  kwonka ekyomugisha omubi,Kamugisha akantera ekikonde kya ha maisho nikwe kugwa ahansi obwe omwe omu bakanyama arikwenda kuntema nomuhoro. Kunagumire nyemerire omutwe gwagye bakaba nibaza kugutemamu ebicweka bibiri kandi nkaba ninza kufa. Ahabwokugira ngu nkaba ndiyo ningwa ahansi, omuhoro ogwakwasire gukaba gwahwire amani maingi, bakanyama abo bakagumizamu bantera ebiti ebyabaire birimu emisumari kwonka ekyomugisha emisumari egyo terakwasire aha mutwe.

Abikiriza nibo binyambire bakakiiriza bakatwara omunda yekereziya. Ahabwokushanga ngu bakanyama bakaba baine ebirwaniso abatuura tibaragire kurwana nabo bakabareka bagaruka omuka ya Kamugisha ahu babaire barugire.

Poriisi ya Buhweju bakatunga okumanyisibwa kwonka bakaija bwanyima yeshaaha emwe kuhwa. Abatuura kubayorekiire poriisi ahu bakanyama baruga, Poriisi ekoreka oku yaaba aine kubanza yatasya amagara ge nikwe kumutwara ahirwariro erya Nsika health center iv kutunga obujanjabi obwaho naho.

Nikigambwa ngu bakanyama abo bakarara omunju ekiiro kyoona nikwe kugyenda omukasheshe aha shaaha nka ishatu baheza kutunga ekyokuywa. Poriisi ekaija kubaronda aha shaaha itano zakasheshe bwanyima yabakanyama kugyenda.

….BIMWE AHA BIBUZO EBINDIKWEBUZA…….

Kuharabe habaire hatarimu okurya enguzi hamwe nokukwatanisa na poriisi, ahabweki Poriisi ya Disiturikiti yaremirwe kukwata bakanyama abo eizoba eryo kandi babaire nibamanya ahu babaire bari? Ahabweki poriisi yarekiire abantu batarikumanywa bakatura omukyanga kumara obwire buraingwa barikuteganisa ekyaro kumara wiiki ishatu? Ahabweki poriisi etarakwasire abebyokwerinda ekabata aha kereziya kurinda obusigye kandi obwe babaire nibamanya obutikirizingana obwabaire buri ahitaka eryo?

Ahabweki Poriisi yariizire bakanyama abo kubanza bagyenda reru bakabona kwekwatsa ngu bariyo nibabaronda? Eki nikyorekyera kimwe oku Poriisi erikukoragana naba gaiga nobu bakuba nibo bari omunshobe. Eki kikaretera nasigara ndikwebuza gaba gari amaziima poriisi ya Buhweju eriho kukuma hamwe nokurinda obusigye, kyaba kiri ngu hati etandikire kurinda enkozi zebibi.

Ebikorwa nkebi tutwire nitubireba omukyanga ekya Buganda hamwe na Kampala obwe turikutekateka ngu nahabwokushanga ngu okwe eitaka ryine sente nyingi, kandi tutekateka ngu Gavumenti eriyo nekora aha nshonga zaabo. Obu wareba ebirikuba okwe byahiika omukyaro nka Buhweju ahu abantu batarikwebasa, nitusigara turikwebuza oraije kuhona ekiiba eitaka eki nooha?

Tugiire ngu Gavumenti eremirwe emirimo yayo yagikwasa abebyokwerinda kuba nibo bakora aha mishango yamataka?? Wareba omunyishengyero nibahiika aha kumutera bakamwata nomutwe, hakabura ou bakwata?? Mbweshi nogira ngu kyahiika ahabantu baburaijo nihabahoki? Poriisi omuri Buhweju aine kurugayo ekashoborora ahabweki nibashagiika enkozi zebibi.