BISHOPU OMUSYA W’OBUREBEREZI BWA NORTH ANKOLE DAYOSISI
Akabaho sipiika wegomborora ya Rushere ataine kihakanisa
Aha ebiiro 06/03/2024 abarebereezi boona kuruga omu Dayosisi eziri omu Uganda baketeranira omuri ahitendekyero erya Lweza nekigyendererwa kyokutoorana abareberezi babiri abasya. Orukiiko oru kurwagiire kuhendera bahinguza amaziina abiri gabahereza ba mukama kuba nibo batara obwa Bishopu. Rev.Can. Alfred Muhoozi niwe yatorainwe kuza omu bigyere bya Rev.Can Stephen Namanya .
Enkuyanja yabikiririza beteranire aha mbuga zoburebereezi bwa North Ankole dayosisi kwakiira omurebereezi Rev.Can.Alfred Muhoozi ogiire omu bigyere bya Rev.Can. Stephen Namanya ohumwire. Ori Ishabareberezi wekanisa ya Uganda Dr. Rev Can. Steven Kazimba Mugalu niwe akoziire omukoro gwokumuta omntebe aha mbuga zobureberezi St Emmanuel’s Cathedral Rushere. Oburebereezi bwa North Ankole dayosisi bukahamibwa omu 2003 kandi ogu yaaba omurebereezi wa kashatu.
EBYOINE KUMANYA AHARI REV.CAN ALFRED MUHOOZI
Rev. Can Alfred Muhoozi akazarwa 09/10/1972, kandi abazaire be ni James Byempaka hamwe na Constance Tushemereirwe boona abatakiri mumagara gensi . Bishopu Alfred Muhoozi nomushaija ogizirwe nomukyara we Molly Muhoozi ou ainemu abaana baana.
Ebyokushoma kwe akabitandiikira ahari Rushere primary school omu mwaka gwa 1982 nikwe kurugayo akaza Mbarara municipal school. Kwonka ahabwokushanga ngu nyina akaba atakwebasa sente za municipal school zikamurema nikwe kugaruka Rushere ahu yamarire ekibiina kya mushanju omu 1990.
Bwanyima yokumara ekiibina kya mushanju akaza Kaaro high school erikushangwa omuri Kiruhura, kwonka okwe akashomayo etaamu emwe nikwe kuruga omwishomero. Omu 2001 Muhoozi akaza omu byobutegyeki, nikwe kwesimba aha ntebe yobwa kasara kujwekyera egomborora eya Rushere ahu yasingire akaruru. Ogu akaija yayesimba ahabwa sipiika bwegomborora yarabaho hataine mukahanaise.
Omu 2003 akasharamu kugaruka ahishomero kushoma, kandi okwe niho yabuganiire Rev.Stephen Namanya owabaire ari omuhandiiki woburebereezi. Ogu akamugambira oku yabaire aine ekitekateko kyokuba omuburizi wengiri, Rev. Steven Namanya akakiira ekitekateko kye nikwe kugambira Bishopu John Muhanguzi owikirirze Muhoozi kuza omu buburiizi .
Bishopu Muhoozi akoherezibwa omwitendekyero erya Namugongo kutandiika kushoma okwabakuru okwamuretiire yatandiika orugyendo rwokuba omuhereza wa mukama. Ogu ebyokushoma tarabikomize aho akagumizamu yashoma yatunga dipuroma yashoma digurii omu byediini kandi obwahati aine masitazi omu byediini hamwe nebyetunguka kuruga ahitendekyero erya Mukono.
Omu 2007 nibwe atunga obwahure kandi omu 2009 bakamutwara omu parishi eya Kijuma kuba omuburiizi wekanisa. Ogu akaija yakoora omu kanisa eya Sya obwahati eri obusabadikoni, hamwe na Nshwere ahu yakozire kumara emyaka 11.
Ahu bagiire kumutoranira kuba omurebereezi abaire akozire nka sabadikoni wa Rwemikoma, ahu yamazire emyaka mwenda nikwe kumwihayo bakamutwara omu buriisa obwa Kinoni ahu abaire yamara emyaka ebiri nekicweka.
Oburebereezi bwa North Ankole buri omu disiturikiti ya Kiruhura ahu ekitebe kikuru kiri. Oburebereezi obu nibutwara disiturikiti eibiri ezirimu Kazo hamwe na Kiruhura. Oburebereezi obu bwine amariisa 16 hamwe nekanisa ezaharurego rwa parishi 72. Ebyobwegyese nabyo babikwatiise amani ahu baine amashomero 12 agatandikirwe ediini.
