OKURINDA EBY’OBUHANGWA, KATUREEBE MICHEAL NARUNDANA TAANI 3 ZEBICUPA BURAIZOBA

Katureebe Micheal akashoma eby’amateeka ebikwasire aha by’obuhangwa, eki nikyo kyamuretiire yagiira entekateka y’okuronda ekintu ekyakubasa kumaraho ebicumpa hamwe nebiveera ebiriyo nibimaraho obutonde bwensi.

Obwahati atiire amani omu kurundana ebicupa ebya purasitika nkomuringo gumwe ogw’okurinda eby’obuhangwa kandi nokuhwera abantu kutunga emirimo.  Fakitore eki eri aha rugundo orwa Mbarara Isingiro waaba noza kuhiika aha mayiro 4. Omurimo gw’okurundana ebicuupa yagumaramu emyaka 6 ahu abaasize kukora omurimo muhango gw’okuboneza obutonde bwensi namunonga etauni ya Mbarara ahu arikwiha ebicupa ebi.

Obwahati omwanya gwe ogwarikurundaniramu ebicuupa ebi burizoba nayakiira taani 3 zakasasiro yebicuupa ebiurikuruga omu kibuuga Mbarara.  Ebicuupa ebyakurundana naija abyongyeramu omutindo obwe arikubikoramu ebintu bitari bimwe nabimwe. Naagira ngu ebicuupa ebi kubirikuhiika aha fakitore ahu aineho abakozi barikurenga 20 nibatandiika  kubitoorana obwe barikubita omu ndengo zitari zimwe nazimwe.

Ekigyendererwa ky’okukora eki nahabw’okushanga ngu fakitore ezirikukora ebintu bitaribimwe nabimwe nka ebikoopo, ebafu endomora ezarikuhereza  ebirikuruga omu bicuupa ebi nibaba nibenda ebintu ebikugyendera aha bibarikukora.

Bwanyima y’okuteereza kasasiro egi nibagitwara omu kyooma ekirikugiteera hakarugamu eki omujungu erikweta (raw material) ei fakitore zirikukoresa kwihamu ebindi bintu byokukoresa. Ekirikumanyisa ngu Katureebe Micheal nahindura kasasiro yebicuupa ekirungo eki fakitore zirikwihamu ebintu ebiturikukoresa omu maka gaintu.

Naagira ngu nobu arabe nayakiira ebicuupa bya purasitika ebyarikuhindura, kwonka akiine ekizibu kyokushanga ngu ebicuupa byoona tarikubikoramu ebyarikuba nayenda ahabwokubura ebikoresa. Aha biika mwenda bya purasitika, Katureebe aha fakitore ye nayakiira ebiika 4 byonka ekirikuretera ebicuupa ebindi ebiri omu biika 5 byabura ahokuuza.

Nobu obuhangwa bwensi burikweyongyera kusisikara ahabwebicuupa ebi abantu barikunaga buri hamwe, otireho okutahirira ebyobuhangwa obwe barikuteema emiti hamwe nokuhinga. Micheal nayoreka oku purasitika yakubaire etaine kizibu abantu bamanya okubashemeraire kugitwazamu.

Ebintu bya purasitiika ebi abantu barikukoresa omu maaka gabo byine omugasho gwamani namunonga byaheeza kukura ahabwokuba nibabigarura omu fakitore kwihamu ebindi bintu bisya. Ekirikumanyisa ngu abantu bamanya akarungi akabirimu nababa batarikugaruka kubinaga kureba kubirundana bakabimutwarira.

Obwahati Katureebe Micheal nayenda Gavumenti  ekwatireho abantu abari omumurimo gwokurundana kasasiro egi obwe barikugihamu ebindi bintu ebyomugasho. Naagira  ngu gavumenti yamukwatiraho  akatunga sente  zokwogyera omu fakitore egi obwe arikugura ebyooma nikiza kumuhwera  kwongyera aha bwingi bwa kasasiro eyarikwihamu ekirungo eki fakitore zirikukoresa .

Oijuke ngu buri Mwaka kurugirira aha kitongore kye NEMA nikyoreka oku eihanga ririkurundana taani zakasasiro ezirikurenga omuri 600 buraizoba. Ekirikumanyisa ngu kasasiro egi erikuba erimu ebintu byingi yaaba etakozirweho ekarugamu ebintu ebindi ebyomugasho neija kwongyera kuba eyakabi aha magara gabantu hamwe nobutonde bwensi oburiyo nibuhwerekyerera.