ABANTU 3 NIBO BAHAMIBWE KUBA BAINE OBURWAIRE BWA MONKEY POX OMU UGANDA
Abantu 17,000 omu Africa nibo baine endwara egi kandi 500 nibo bisirwe oburwaire obu
Kurugirira aha kitongore ekyebyamagara omwihanga nikyoreka kuruga okweezi okwa mukaga hamwe nokwamushanju Disiturikiti ya Kasese ekatunga obubonero bwendwara egi aha mwatano gwayo nihanga rya Congo. Bwanyima yokukora okucebera abantu ababaire nibatura kandi nabarikukoresa boda ya Bwera abantu 6 bakatunga obubonero bwendwara egi aha biiro 11/07/2024. Bwanyima yokutwara eshagama yabo omu rabaratore kucebera, ebyarugire omukuceberwa bikaba nibyoreka oku abantu 2 bashangirwe baine endwara egi. Omu bashangirwe baine endwara egi hakaba harimu omukazi wemyaka 37 hamwe nomwishiki wemyaka 22 y’obukuru boona enzarwa.
Okucoondoza kukaba nikworeka ngu abantu aba abaine oburwaire obu ninga abarikutunga oburwaire obu nibabutunga kuruga aheru eihanga kutari kugiira ngu buri omwihanga. Nobu harabe hatariho omuntu weena owisirwe endwara egi, kwonka okucoondoza nikworeka oku endwara egi eriyo neguma neyeyongyera mpora mpora.
Ekitongore ekyebyamagara omwihanga rya Uganda nikyoreka oku endwara egi erikukwata omuntu kuruga aha ndaijo namunonga yaaba aine oburwaire obu okamukwata omungaro. Abaana abari ahansi yemyaka 5 nibo bari omukabi kamani, abakazi benda,hamwe nabo abaine amagara makye. Abebyamagara omwihanga rya Uganda nibenda abantu boona baze aha buzoora misho kugiira ngu omuntu weena ou bararebe aine obubonero bwendwara egi agambire abebyamagara abamurihaihi.
Kurugirira aha kitongore ekyebyamagara omunsi yoona nikyoreka oku abantu barikurenga 17,000 kuruga omwaka ogu kutandiika bakwasirwe endwara egi kandi abantu 500 nibo bisirwe endwara egi kuruga omu mahanga 13 omu Africa.
