OKUKWATIRAHO ABAANA BABISHIKI ABARUKUBONA BONANESIBWA, EKITONGORE EKYA DREAM NIKIZA KUHWERA ABARIKURENGA 1269 OMURI MBARARA
Aba nibenda abaana babishiki barekye kuza omu bikorwa byomubonano ebirikuretera barwara akakoko ka sirimu bakiri bato
Abeegi kuruga omu Divijoni eya Kamukuzi ,Kakoba, Nyakayonjo, Kakiika hamwe namagomborora agari omu disiturikiti eya Mbarara nibo baraije kuganyirwa omu puroguramu erikubangura abaana namunonga ababishiki abarikuba batungire okurabanisabwamu kuruga omu maka gabo.
Ebi Dr. Abdalah Nkoyoyo ori purojekiti direkita wekitongore ekya USAID abigambire obu babire nibahereza abeegi 60 ebikoreso abamazire omwaka barikutendekwa ebyemikono. Abeegi aba abatungire obukugu omu byokubaziira , okukoma amashokye, okuteka hamwe nendaijo mirimo yemikono batungire amabaruha gabo eizoba.
Abeegi abu ekitongore ekya Dreams obwe kikwatanise naba USAID hamwe na TASO abu barikukwatiraho naabo abarikuba batungire ebizibu obwe bakiri bato nka; okutwara enda ,okuruga omwishomero ahabwokubura fiizi, okwejumbira omu bikorwa byobushambani.
Oijuke ngu obutabanguko omu maka nikimwe aha nshonga eziriyo nizireteera abaana babaishiki bayeyongyera kuruga omu mashomero hamwe nomumaka gaabo barikuhunga ebizibu ebi barikubugana. Eki kiretire bamwe bayejumbira omu bikorwa ebirikuretera amagara gabo gaza omu kabi ebirimu obushambani hamwe nokukoresa ebitokoza bwonkwo obwe barikuronda oku barabeho.
Omwishiki ou twayeta Annet agatari maziina ge tumushangire aha mukoro ogwekitongore ekya DREAMS obu babaire nibahereza ebikoresa abaana babishiki abaherize kutendekwa ebyemikono. Anet naagira ngu omunyabuzare owamutwire kumushomesa akahika nahakumutweka enda 2 ekyamuretire yatoroka yo nikwe kuza omu bwamaraya omukibuga Mbarara.
Abaana babaishiki okubonabonesibwa omu miringo etaryemwe nemwe nikimwe ekiretiire ekitongore ekya DREAMS obwe kikwatanise nekitongore ekya USAID hamwe nekya TASO kurundana abaana babaishiki abatungire okurabanisibwamu okwe, obwe barikubatendeka emirimo yemikono nkomuringo gumwe gwokubakwatiraho. Abeegi 60 nibo bamazire emishomo yaabo kandi aba batungire nebikoresa byokutandikiraho.
Okuhwera abaana babishiki aba kurugirira ahari Dr. Nkoyoyo nahabwokwenda kubahwera obutejumbira omu bikorwa by’obushambani ebiretiire abaana babishiki bakwatwa akakoko ka sirimu bakiribato. Okucoondoza nikworeka oku emishango yomumaka erikurenga 5932 niyo ekozirwe kandi eminyeto erikurenga 9490 omukibuga Mbarara nibo barikutura nakakoko ka sirimu ahu 6000 aharyabo bari nabaana babishiki.
Abeegi barikurenga 1269 kuruga omu disiturikiti ya Mbarara hamwe nomukibuga Mbarara nibo baraije kuhwerwa omu purojekiti egi obwe barikutunga obukugu omubyemikono. Aba bashabirwe kuba ekyokureberaho hamwe nokuhwera abandi abaine obuzibu nkobubabire nibarabamu.
