ABA UNRA MWATUKABYA NOBUSH’OMANKUZI, ABAVUGI BEBIMOTOKA BYA SINO TRUCK BAYESHARINGA
Buri wiiki aba sino truck nibashashura sh500,000 aba UNRA ezitariho rusiiti.
Burikushesha eraizoba ebiiro 05/10/2024 abavugi bebimotoka ebirikumanywa nka Sino trucks ebirikukorera aha ruguudo rwa Mbarara Kabale namunonga abo abarikwiha omushenyi omu binombe ebiri omuri Rwampara Disiturikiti bayesharinga. Aba okwesharinga kwabo kwaba kurimu okwemereza motoka zaabo omuruguudo ekyaretera ebyentambura byayemerera kumara eshaaha munana ahabwokworeka obutashemererwa nekitongore kya UNRA ekibaruhize nokubashonkura.
Bamwe aha bavugi bemotoka ezi nangwa nabakama bazo abu twashanga emotoka zaabo zikingire oruguuto omu tauni eya Kinoni bayoreka obutashemererwa ahabwobushomankuzi bwabakozi ba UNRA abarikubatera ebipapura bwashesha bwira ngu bapakiire ekirenga. abavuugi niboreka oku abekitongore kya UNRA kibahindwiremu omusiiri obwe barikubihaho sente zirikwingana sh500,000 (emitwaro makumi atano) buri sande.
Esente ezi kurugirira aha ba sino truck tibarikuzihereza rusiiti kureka abakozi ba UNRA abarikuba baine ebyooma byabo nibo barikwerira akasente. Obwahati nibenda omukozi wa UNRA orikumanywa nka Mugabi arugyeyo abashoborore ahu sente ezibarikubihaho ahu zirikuza noku barikupiima motoka eya rezya oburemezi obu motoka eshemeraire kuba neyekorera.
Poriisi hamwe namahe kuruga aha kitebe kikuru ekya Rwampara hamwe na Mbarara bahiika aha mwanya nikwe kuragiira abavugi kwihaho ebimotoka byabo aho niho omwe omubakozi ba UNRA owamanywa nka Mugabi owaaba nagyezaho kushoborera oku barikutwaza emirimo kukwatwa poriisi ekyaretera abavuugi bebimotoka bashemererwa ahabwokushanga ngu niwe abaire abaruhize nokubiba.
