ENG. MBONIMPA SENTE ZA BUSHENYI DISITURIKITI NAZIMIRA NKEKYOMA KYEBICOORI!!!!
Emyaka 35 ei amazire eri Inginiya wa Bushenyi ebaire eri eyokwiba, 1.5B tibarikumanya ahu yazitiire
Omunyamakuru waitu
Obushomankuzi oburi omu bebembezi abarikwebembera disiturikiti ya Bushenyi buregyeseraize kyaretera nomwana muntu yamanya ekiri omuri Bushenyi. Ahuturikugambira ebi abatuura ba Bushenyi bekoziremu omurimo bakwata Mbonimpa Kiiza omazire emyaka 35 ari Inginiya wa disiturikiti. Ogu aizirwe kutwara aha poriisi ya Bushenyi kuha sitetimenti ahabweki anyangaraize sente za disiturikiti.
Kyahiika aha kuhuuta sente za disiturikiti Mbonimpa nakwata omwanya gwokubanza kandi ekyokutangaza nokushanga ngu nobu barikumutunga akakukumu abebembezi ba disiturikiti nibabyehuzya.
Obwahati Miriyooni 390M ezabaire ziri ezokwombeka ekishayi kya Kabushaho ezo kuzamuhikire omungaro ekishayi nahati tikyakahwaga. Oije ngu omwaka oguhwaire akakiiko aka PAC kebembirwe Kamadhi Muhammed kukabaire nikakyondooza enkoresa ya sente omu disiturikiti egi, Mbonimpa akaremwa kworeka enkoresa ya 1B ezabaire ziri ezokukora enguuto ezabaire zirimu; Bumbaire, Kyabugimbi, Ruhumuro hamwe na Bitooma kandi obwe sente zashohwaire.
Akakiiko aka kakoreka amani kahiika nahakurahiira oku Mbonimpa arikwija kushashura sente ezo ninga arekure omurimo. CAO Phiona Sanyu owabaire ari omukakiiko ako nawe akoreka kwatarikubasa kukora nabantu abarikweyendeza , kwonka ebyo byoona bikakoma aha kubigamba omushaija yayongyera kucwekyereza sente.
Ekyo tikyo kyonka Inginiya Mbonimpa akwatanise na Iginiya wa Disiturikiti owebyamaizi bakarebukaho omu kanso barikwerenga naba kansara bwanyima yokuryangatanisa emotoka ya gavumenti. Motoka yekiika kya double cabin namba LG0221-06 ekaruga aha Disiturikiti yabuza amaisho nobu disiturikiti yabaire eragirire ngu nibenda kuguza emotoka egyo nokuhisya nahati pyee.
Apollo Kakonge obaire ayebembire abandi bantu abarikwenda ebirungi hamwe netunguka omuri Bushenyi nagiira ngu Mbonimpa aruhize disiturikiti kandi tarikumanya ahabweki batarikumugambaho. Nayoreka ngu Bushenyi Disiturikiti omu mbarira yomwaka 2023/2024 disiturikiti ekatunga sente zirikwinga 1500M zokukora enguuto kwonka aha sente ezo Mbonimpa akaremwa kworeka ahu Miriyooni 700M eki zakozire. Kakonge naagira ngu “ korikubuza ahu sente zagiire bakugira ngu bakazibiika omu majuta, hoona shi nahati emyezi 7 zikiri aha majuta?”
Obwahati nibenda Iginiya ogu aborekye oku yakoraise sente zirikwingana 3B ezi disiturikiti yatungire omu Mbarira yemyaka ebiri nekizakozire. Kyaba kitari ekyo tibaraije kwikiriza Mbonimpa kugaruka omu offisi nka Inginiya wa disiturikiti.
