ISINGIRO DISITURIKITI ESIMIRE EKITONGORE EKYA NRC AHABW’OKUBAKWATIRAHO OMU BY’OBWEGYESE.
Obucweka 96% bwabeegi omu kampu hamwe naaba abatari mpungi baganyirwe omu puroguramu egi
Disiturikiti ya Isingiro esimiire emirimo yekitongore ekya NRC (Norwegian Refugee Council) ei kitwire nikikora omu disiturikiti egi namunonga kyahiika aha kuhwera empungi hamwe nabanya Uganda abarikutura omu kampu eya Nakivale Refugee settlement.
Ekitongore eki kihweraire Isingiro Disiturikiti omu byobwegyese ahu bakozire omurimo muhango omu kwombeka ebyombeko byabeegi kushomeramu hamwe nokukwatiraho gavumenti obwe barikushashurira abashomesa 89 omushara.
Emyaka 2 eibamazire omuri Nakivale Refugee Settlement omu puroguramu emanyirwe nka (Innovative & Inclusive education programe for refugees and host community). Ekitongore eki kutungura ebyobwegyese omuri Isingiro. Omu puroguramu egi ekitongore eki kibasize kwombeka ebibina 3 okushashura omushara gwabashomesa 89, okuhunduza ebyombeko byamashomero ahari Rubondo hamwe na Kabahinda. Kuruga puroguramu egi etandiika abeegi barikwingana 23599 baganyirwe omu puroguramu kandi abashomesa 324 batungire ebikoresa ebirikubahwera baba nibegyesa.
Obwahati puroguramu egi eyatandiikire omu 2023 ehikire aha kuhendera kandi omukoro gwokwajurira abebembezi ba disiturikiti ya Isingiro ebi ekitongore kibasize kukora, gubaire aha Acacia Hotel hanu omuri Mbarara.
Alon Turahi ori ceyamani wa disiturikiti asimire ekitongore ekya NRC ahabw’okutungura eby’obwegyese ahu Isingiro ebaire yatandiika kuranganwa omwihanga. Turahi naagira nayoreka obusasi bwanyima yokureeba ekitongore eki kiriyo nikihendera emirimo yaabo namunonga aha kukwatiraho ebyobwegyese ahu ayorekiire oku Isingiro ebaasa kugaruka enyima kyahiika ahaby’obwegyese. Nashaba office yengazi eihanga kurugayo aho naho ekeba niyo yaaza omubigyere bya NRC ahabwokuba nka Isingiro tibaraije kubaasa.
Aswani Adams orikwebembera ekitongore ekya NRC omu Uganda naagira ngu nobu puroguramu yokutungura ebyobwegyese ei babaire baine omuri Isingiro ehwaire, tikirikumanyisa ngu barugire omuri Isingiro ahabw’okuba hakiriyo puroguramu ezindi ezibarikukora.
Omujwekyerwa awa puresidenti ahabwa Isingiro omukyara Adah Ninsiima ashabire abebembezi hamwe nabarikukurira amashomero agu NRC ekwatireho, kwekoramu omurimo gwokureba ngu ebi bayombekire tibyasisikara kureka byagumaho. Nobu puroguramu egi ehweraire abanya Isingiro kwonka okuhendera kwayo nikuza kuretera abantu nyamwingi baferwa emirimo.
Oijuke kuruga puresidenti wa America Donald Trump ayemereza obuhwezi obu America yabaire nehereza amahanga ga Africa, ebitongore nyamwingi omwihanga rya Uganda bigyezire nibikinga ahu omu kampu ya Nakivale ebitongore ebirikurenga 6 bikingire.
