BAKANTERA KUMARA ESHAAHA 7 -OMWEEGI NAGASHA MOREEN TARIKUSHUTAMA AHABW’ENKONI
Abashomesa 4 bakamuteera enkoni ahabw'okumutekatekaho ngu aibire sente sh 45000 zomweegi mutahiwe
Abashomesa baana hamwe nowakakiiko aka PTA kuruga ahishomero erya St. Victors High school eririkushangwa omuri Katara omuri Buhweju Disiturikiti nibo bakwasire omweegi omanyirwe nka Nagasha Moreen bakamuteera enkoni kuruga shaaha itano zekiiro mpaka shaaha ikumi nemwe zomukasheshe.
Nagasha Moreen obaire nashomera ahishomero eri omu S.1 obwahati niwe ari omwirwariro arikutunga obujanjabi bwanyima yokuterwa emboko ezitakabahoga obwe barikumutekatekaho kuba yayibire sente zomwegi zirikwingana sh45000.
Kurugirira ahari munywani we ou abaire nashoma nawe kandi okozire omurimo muhango kureba ngu yamushendekyereza omwirwariro, naagira ngu “Moreen bakamutwara omu staffroom bwanyima yokumutekatekaho ngu yiiba sente ekiiro nikwe kumuteera kandi kuyarugireyo yabagiira ngu bamujuure emyenda. Kubagiire kumwihamu emyenda nikwe kureeba omubiire kurikushushuka Weena arikujwa eshagama”.
Omweegi ou amaziina ge tutayenda kugagamba naagira ngu abashomesa nibo bamwerunzireho bakamuteera enkoni kandi ekyokutengaza nokushanga ngu na mukuru weishomero omwami Kabagambe Benard akaba aryomwe omubamutiire.
Nagasha Moreen ou tushangire omwirwariro naagira ngu abashomesa abarimu Hanifer, Sadius,Nicholus, hamwe na Benard nibo bamutiire enkoni ezamuretiire yafutara omubiri gwona bwanyima yokumara eshaaha 7 barikumuteera ngu yayiiba sente zomwegi. Ogu naagira ngu aha shaaha ikumi nemwe buri kushesha omushomesa Elias niwe yamugirire embabazi akabagiira ngu ogu omweegi tiwe yiiba sente, nikwe kumwimusya ngu agyende.
Bwanyima yokuhiika omu Domu bakamureba oku yabaire eri, head girl niwe yagarukiire omu offisi akagambira mukuru weishomero ngu Moreen yaaba kubi. Aho niho bakwasire abeegi abanda abamuhwerire bakamutwara omwirwariro kandi bakanga nokugambira abazaire be. Ogu kuza kumumanya abaire amazire ebiiro 4 bamusherekiire ngu obundi akakiira
Omushaho aha Diisi medical care ahu Moreen ariyo natungira obujanjabi ahamize oku omweegi ogu yatiirwe kandi bamushangire aine obuhuuta bwamani aha kibuunu ahu babaire nibamuteera kwonka bariyo nibakora ekirikubasiika kureeba ngu yakiira. Mukuru weishomero ou tugambireho nawe ayekakiine kuba yakwatanise nabashomesa kuteera omweegi, kureka nayoreka oku abeegi bagyenzi be nibo bamutiire reru abashomesa bakabamwihaho.
Omugambirizi wa Poriisi ahabwa Bushenyi empago SSP Tumusiime Martial yahamya amakuru aga ahu yatuhamisiriza ngu abashomesa abarimu : Nyakato Hanifer, Muramagi Sadius, Nicholus Kiiza hamwe na Mukuru weishomero Kabagambe Benard bari enyiima yemitehimbwa kandi nibaza kutwarwa omu kooti kwehozaho. Martial ajumirire ekikorwa eki obwe arikugiira ngu omweegi kuyakubaire yatwire sente zabandi, bakuru bishomero bakutwire omushango aha poriisi kutari kutwarira amateeka omungaro.
