EKIKONDE OMURI RWAMPARA ABARIKWENDA KAADI YA NRM TIBARIKUREBANA

Aha rwamukaga ebiiro 05/04/2025 esabiti ehwaire ekibiina kya NRM kikashohooza egyenderwaho ei baraije kukuratiira obwe barikuronda abebembezi abaraije kubakwatiira ebendera omukaruru.

Okuronda akaruru korakwatiire NRM ebendera omuri Rwampara disiturikiti nikenda kwakamu omuriro nangwa nabamwe ekikode nibaija kukireba bwanyima ya NRM kurangirira ngu tihakiriho oyesimbire Weena oraije kukora kampaini nk’omuntu wenka. Obwahati abesimbire aha tiketi ya NRM nibaija kuba nibaza aha kadaara boona omukono gumwe reru bagambire abantu ebi baraije kubakorera.

Eki obwahati kiriyo nikiteganisa abo abatwire bari abebembezi ahabw’okuba ebibuzo ebi ababesimbireho baraije kubabuza abamwe nibaza kuhemuka. Oijuke ngu obwahati omuri Rwampara eyamashuma erimu amagomborora nka Ndeija hamwe na Rugando kandi amagomborora ago abiri garimu abarikwenda ey’omunyishengyero aha tiketi ya NRM.

Obwahati abesimbire ahari Amosi Kankunda otwire ari omunyishengyero ahabwa Rwampara nibarenga 4 kandi batwire niboreka oku ataine ekyakorire abanya Rwampara nobu abamwe barikungira ngu buzima Amosi akozire ekimushemeraire nk’omunyishengyero.  

Obwahati kampu zabesimbireho boona batwire barikworekana enkumu hamwe nokugambirana ebigambo by’okutinisiriza nangwa nabamwe barebiire obugambwe bwabatahi babo. Obwahati  ekikonde nikyo kiraije kuramura bamwe aha besimbire ahabw’okuba obutikirizingana ahagati yabatezi bakaruru hamwe nabesimbire bikatandiika kare.

Abu tugambireho naabo kuruga omuri Ndeija, Kinoni, Rugando, Buteraniro hamwe na Nyabikungu niboreka oku akaruru aka NRM karikwija kuba kari akokufa nokuhona ahabw’okuba buryomwe naija kuba nayoreka amani ahu poriisi hamwe namaahe garaije kuba nigo garabe nigakora burikimwe ekirareteere abateezi bakaruru abamwe barugwamu.

Ebiiro 17/06/2025 boona abarikwenda kwesimba aha bwa MP aha kandi ya NRM nibwe baraije kwehandiikisa hamwe naabo abarikwenda entebe yakatano hamwe naba Kansara ba disiturikiti. Okutandiika kuronda obushagiiki omu bantu ningashi ekibaingi barikumanya nka kampaini niziza kutandiika ebiiro 01/07/2025 reru okuteera akaruru kaabo abarabe besimbire aha bwa MP nebiiro 16/07/2025. Okuteera akaruru kabo abesimbire ahabwa ceyamani wa disiturikiti hamwe naba Kansara aba Disiturikiti nebiiro 24/07/2025.

NOGIIRA NGU ABESIMBIREHO NIBAIJA KWIKIRIZINGANA KUKORA RALLY EMWE MPAKA BATAIRE AKARURU?? Tugambire etekateka yaawe.