EKIBIRA KYA KAMUKUZI PYEEE!!! ABASHUMA BAMATAKA BAKITEMIRE NGU BAINE EKYAPA
Abaryibire bakatunga ekyapa omubwire obu JB Bamuturaki yabaire eri ceyamani wa Disiturikiti ya Mbarara
Nebya : Duncan ainebyoona
Abaataka ba Kamukuzi omu kibuga Mbarara eizoba rya Sande ebiiro 13/04 /2025 omumwebazyo bagwerirwe akagwe obu abantu abatarikumanywa batahirire ekibiira kya Gavumenti ekya Kamukuzi Central Forest Reserve bakitema nangwa bakahiika nokureta byakarakita obwe barikukura emiti.
Kurugirira ahari Kamugisha Harbert ori ceyamani wakakiiko aka PAC aha disiturikiti ya Mbarara, naagira ngu “eitaka eri ekibira kiriho rikaba riri ery’obukama bwa Ankole kwonka nka munisiparite ya Mbarara obwire obuhwaireho basharamu kurihereza aba NFA kubyaraho ekibira ekyamara emyaka erikurenga 20. Mbwenu omuntu orikurugayo akagiira ngu eitaka eri nerye buzima naaba nayebiiha kandi owakuba yakozire ekyapa ky’omwanya ogu naba yakozire ekicupuri”.
Moses Kakubaireho ori kukurira okubyaara emiti omukitongore ekya NFA (National Forestry Authority) ahabwa Mbarara, naagira ngu ekibira ekya Kamukuzi nikingana hekiteya 8 kandi nikirebererwa ekitongore ekirikukurira ebibira omwihanga ryoona. Eki nikimanyisa ngu tihariho omuntu Weena oshemeraire kuba aine ekyapa kyoona omwitaka eri.
Abashuma bitaka aba kurugirira ahari Moses babaire bahisya hekiteya 1 eibatemire kandi babaire bataho namabati kuhazitiira. Nkabarikureberera ebibira nibaija kukora ekirikubasiika kureba ngu bashazamu ekyapa kyoona ekibarashange ngu kiri omwitaka eri.
Didas Tabaro ori ceyamani wa Disiturikiti ya Mbarara naagira ngu nekyamaziima hariho ekyapa ekiri ahitaka eri kandi kiriho abantu babiri, nobu atagambire maziina gaabo. Obwahati nayenda orikukurira ebyamataka aha disiturikiti ya Mbarara hamwe nowekibuga kya Mbarara barugyeyo bashoborore oku bagabire ekyapa ahitaka rya Gavumenti. Okucondooza hamwe nebigambo bya Didas Tabaro nibyoreka oku abashuuma bitaka eri batungire ekyaapa omu bwire obu JB bamuturaki yabaire eki ceyamani wa Disiturikiti ya Mbarara etakahidukire ekibuga.
Nikwe kushaba abebembezi bekibuga Mbarara kukwatanisa naaba NFA hamwe na Disiturikiti ya Mbarara kureba ngu abashuma aba tibatwara eitaka rya Gavumenti. Obwahati omwanya ogu Poriisi hamwe namahe ga UPDF nigo gasigara gakumire omwanya ogu obwe okucondooza kurikugyenda omumaisho.
