TIIMU 4 KUJWEKYERA EKYANGA KYA ANKOLE OMU MPAKA Z’AMASHOMERO EZ’IHANGA RYOONA
St. Kagwa etiire St.John Fisher Ibanda 1-0 omuza kamaririzo nikwe kutwara ekikopo kya Ankole
Nebya: Aloysius Byamukama
Tiimu 4 z’amashomero kuruga omukyanga ekya buregye rwaizoba nizo zirabireho kujwekyera ekyanga kya Ankole omu mpaka z’omumpira gw’amashomero ga siniya ezirikumanywa nka Uganda secondary school Sports Association (USSSA). Empaka ez’omwaka ogu ezihanga ryoona niziza kuzanirwa ahishomero erya Ngora High school kuruga ebiiro 5-13 omu disiturikiti eya Ngora.
St. Kagwa Bushenyi High School nibo bahanguzi b’empaka z’omwaka ogu ahabwa Ankole bwanyima y’okutera St.John Fisher Ibanda na goora 1-0 omumpaka zakamaririzo. Ibanda SS ekatera Nyamitanga goora 5-4 omu semi finozi ekyaretiire Ibanda yaaza omu zakamaririzo kandi yo St Kagwa yatera Kicwamba 1-0.
Eishomero rya St.Kagwa okuhiika aha buhanguzi obu babaire bamaziire emyaka 14 barikugyezaho kutwara ekikopo eki kibaremire. Omumpiira gw’akamaririzo ogu guzanirwe omukishayi ekya Bushenyi ahu enkuyanja yabahagiizi namunonga abantu ba Bushenyi basimire omutindo ogu eishomero ryabo ryorekiire.
Omuzaani Darius Nyesiga kuruga St. Kagwa niwe akozire ekyafayo omu kicweka ky’okubanza obwe arikutera goora y’omutwe ebahikize aha buhanguzi. Collins Agaba niwe abaire arikutendeka tiimu ya St.Kagwa kandi ogu ayorekiire omutindo murungi. Mukuru weishomero rya St. Kagwa Kananga Kamugisha asimiire abazaani ahabw’okworeka omutindo murungi ogubaretiire bahiika ahabuhanguzi obu batwire nibenda. Ogu araganise okwarikuza kuhereza obushagiiki bwoona oburikumara kureba ngu tiimu ya St. Kagwa yagumizamu nekora kurungi.
Emizaano egi emazire ebiiro 5 erikuzanirwa omu disiturikiti ya Bushenyi kandi amashomero 64 nigo gayetabire omu mpaka ezi. Ryakasinga CHE etwire nekoragye omurundi ogu terabasize kuraba omu gurupu sitegi obwe otebirwe tiimu ezindi z’amani ezitabasize kugumizamu nka; Mbarara high school, Ntare school, St. Joseph’s Voc school, Nganwa high school, Buremba SS hamwe nagandi.
Omumpaka ezi tiimu 6 zamashomero nizo zibashaziremu ahabwobutakuratira biragiro by’omuzano ogu ebirimu okuzanisa abazani abataribo.
Ori komishona webyemizano Rev. Can. Duncans Mugumya niwe abaire ari omugyenyi mukuru aha kuhendera empaka ezi kandi abasingire batungire ebirabo ebirimu emidari hamwe nebikopo. Ogu ashabire bakuru bamashomero kurekyeraho omuze gw’obutakuratiira ebirangiiro by’omupiira ahu bamwe barikuhendera babihiire omu muzano ogu ekintu ekitari kirungi.
