ORUKIIKO RWEKIGOMBE EKYA DP ORWA UGANDA YOONA RWATANDIIKA OMUKIBUGA MBARARA
Orutaro omu rukiiko ruri aha gati ya Hon.Sebamala orikwenda kwesimba ahari Hon.Mao
Ekibiina ekya Democratic Party obwahati kiri omukibuga Mbarara aha hoteri eya Asamar erikushangwa omu ruti ahu baineyo orukiiko orurikumanywa nka Delegates conference rw’okuronda abajwekyerwa abarakwatiire ekibiina eki ebendera aha mitendero etaryemwe nemwe y’obwebembezi omwihanga ryoona.
Kurugirira ahari Imam Makumbi ori vice puresidenti wa DP ahabwa buregye rwaizoba, naagira ngu abari omu rukiiko oru nabo abesirwe bonka kandi abantu barikurenga 1,500 nibo barikutekwa tekwa kwetaba omu rukiiko oru.
Richard Sebamala omunyeishengyero wa Bukoto central yaherize kuhika omu rukiiko oru rw’okutorana abeebembezi bekibiina kya DP omu Uganda. Sebamala obwahati orikwenda kwesimba aha ntebe y’obwa puresidenti wa DP obwe arikuhiguraho otwireho Hon. Nobert Mao. Okwija kwa Hon. Sebamala kuresiire obutikirizingana omu bebembezi bekibiina kya DP ahu aborubaju orwa Moa batakwikiriza ngu Sebamala ayesimbe ahabw’okuba egyenderwaho y’ekibiina terikumwikiriza, eki Sebamala erikuhakanisa.
Obuhwaireho turebiire ekikonde kirikwaka ahagati yabahagizi ba DP abatarikwenda Hon.Sebamala ngu ayesimbe ahari Mao. Twine amatsiko maingi ngu byaguma biti orukiiko oru rubasa kuhendera nentomi eizoba rya nyekyakare.
