MUBE BAKAREEBI!!!!! ABEEGI 7292 NIBO BATENDEKIRWE OKUKUNDA EIHANGA RYABO OMURI RWAMPARA DISITURIKITI
Omu myaka 16 kuruga ehururu egi etandika gubaire guri omuri gw'okubanza omuri Rwampara
Nebya: Nahwera Doreen
Nk’omuringo gumwe gw’okubangura eminyeeto namunonga abo abari omu mashomero okukunda eihanga ryabo ningashi eki twakweta Patriotism, abeegi hamwe n’abashomesa omuri Rwampara Disiturikiti batungire okutendekwa okukunda eihanga ryabo.
Okutendeka abeegi abaha rurengo rwa siniya kukatandika ebiro 06/06/2025 kandi kuhendiire ebiro 17/06/2025 ah’eishomero rya Laki high school Bujaga. Endaijo myanya omuri Rwampara ei abeegi batungire okutendekwa habaire harimu Kinoni, Bugamba, hamwe na Mwizi.
Puroguramu y’okutendeka abeegi aba naijaho bwanyima y’okuragiira kwa mukuru w’eihanga omu 2009 okushomesa abeegi okukunda eihanga ryabo, kikahinduka ekiragiro omu matendekyero ag’orurengo orw’ahaiguru hamwe n’amashomero goona omwihanga.
Obwahati, abeegi 7292 kuruga omu mashomero 15 omuri Rwampara nibo batendekirwe. Abeegi abatendekiirwe aha kishaayi ekya Kinoni babaire nibingana 2344, Bugamba, 2251, Mwizi 1442 kandi Bujaga 1255. Atukunda Getrude ori mukuru w’eishomero erya Rushanje Girls kandi ori kodineeta wa Patriotism omuri Rwampara asiimire bakuru b’amashomero abeehiireyo bakaikiriza abeegi aba bakatunga okutendekwa.
Ogu gubaire guri omurundi gw’okubanza omu myaka 16 Rwampara kutunga omugisha ogu kuruga mukuru w’eihanga ahinguza ehururu egi. Abeegi abatungire okutendekwa oku kumara esande yoona bagambire ebi baganyirwemu.
Aha mukoro gw’okuhendera okutendeka abeegi aba, deputy RDC ahabwa Rwampara Tukamuhebwa Gerald niwe abaire ari omugyenyi mukuru kandi abaire ashendekyereziibwe Nakamya Harriet ori RDC wa Rwampara. Ogu araganiise ku okutendeka abeegi omu mashomero ga Rwampara nikuza kugumizamu buri mwaka.
