AMAKURU G’OKUFA KWA PROF. GEORGE KANYEIHAMBA

Christopher Ahimbisibwe

Owaabaireho omuramuzi wa kooti enkuru Profeesa. George Kanyeihamba yaafera aha myaka 86 y’obukuru. Ogu yagwa omwirwariro erya Nakasero akasheshe keraizoba ebiiro 14/07/2025 kurugirira aha ba famire ye ahu abaire amaziire obwire arikushasha. George Wilson Kanyeihamba akazarwa ebiro 11/08/ 1939 omuri Kinaba, omu Disiturikiti ya Kinkizi, omu kyanga kya Kigezi.  Omu famire yowaabo abaire ari omwana w’ahamuheru kandi ow’ikumi nomwe omu famire ya Zakaliya Bafwokworora na Kyenda Malyamu Kyakundwa.

EMIRIMO EIYAKORIRE EIHANGA NOKU YASHOMAIRE

Akaheereza nk’omuramuzi wa kooti enkuru kuruga 1997 kuhisya 2009. Kanyeihamba akaheereza Uganda omu myanya etari emwe n’emwe kandi akaba ari mukuru w’akakiiko k’ebiragiro omwishengyero ry’eihanga.

Akahandiika engyenderwaho y’eihanga eya 1995 kandi akaija yatooranwa kuba memba wa kooti enkuru eya Uganda omuri 1997 nikwe kuhuumura omu Kwaikumi na kumwe 2009.  Atakabaire muramuzi wa kooti enkuru, akakoraho nka minisita w’eby’obushubuzi, minisita w’eby’oburingaaniza hamwe na ssaabawolereza wa gavumenti. Kanyeihamba abaire aine diguri ya PhD omu biragiro kuruga omu yunivaasite ya Warwick.

Akeegyera aha eishomero rya Hamurwa Church School, Nyaruhanga Anglican Church Primary School, Nyakatare Church School, Kigezi High School, Busoga College Mwiri na Norwich City College. Akatunga diguri y’ebiragiro kuruga omu yunivaasite ya Portsmouth.

Omu mwaka gwa 1970, akaheebwa diiguri y’obwa dokiita omu biragiro kuruga omu yunivasite ya Warwick omuri United Kingdom. George Kanyeihamba akaba ari omwebembezi w’eitendekyero rya Kampala n’erya Kabale.

Kanyeihamba akashomesa ebiragiiro aha itendekyero rya Lanchester Polytechnic, obwahati eri Coventry University, hamwe na Yunivasite ya Wales omuri Cardiff. Akahandiika kandi yaaba omwe aha bahandiiki b’ebitabo bingi. Kanyeihamba akashwera Susan Kanyeihamba. Boona hamwe, baazaara abaana bashatu abarimu;  Sarah, Joel na Ruth.