NIBANTURA AMAZIMA- RDC WA RWAMPARA HARRIET NAKAMYA
Abanya Rwampara bangire RDC omusya Maj. Godfrey Katamba
Nebya: Naamara Lilian
Ori omujwekyerwa wa mukuru weihanga ahabwa Disiturikiti ya Rwampara ningashi ou twakweta RDC naagira ngu ebiriyo nibigyenda omu maisho namunonga eby’okumwiha omu bwa RDC nahabw’okugamba amazima omu byarugiire omu karuuru kabakyara ba Rwampara.
Ahu turikugambira ebi ebaruuha kuruga omu offisi ya puresidenti eshohwire erikworeka oku Hurriet Nakamya bamwihire omu offisi bagitamu Maj. Godfrey Katamba owabaire ari RDC wa Katakwi kandi otwire aha katebe kuba niwe yaaza omu bigyere bya Nakamya. Eizoba rya nyimwabazyo RDC omusya Maj Godfrey ahikiire omuri Rwampara kandi ogu abantu ababaire bijwire ekininga bamworekiire oku batarikumwenda omuri Rwampara ahabwokuba RDC ou baine nowamaziima.
Nakamya obaire aine obutashemererwa bwanyiima yokureba Maj.Godfrey aine ebaaruuha eriho omukono gw’omuhandiiki wa offisi ya mukuru weihanga Hajji Kakande Yunus arikuragiira oku Nakamya arekura offisi egi aho naho. Nakamya omu bigambo bye agizire ngu “ tindaije kurekura offisi agi mpaka mukuru weihanga atahiire omunshonga azi ahabw’okuba nibatuura amaziima agu nagambire ngu Annah Kansiime akasinga Molly Asiimwe”.
Maj.Godfrey arikugambaho nabatuura ababaire bijwire ekininga aha offisi za RDC, ayorekiire oku aizire bwanyima yokumuhereza ebaruuha kuruga omu offisi ya puresidenti kwija Rwampara. Abatuura bamworekiire okubatarikumwenda omuri Rwampara ahabwokuba RDC Nakamya ou baine nomukazi wamaziima.
Oijuke ngu ebi byoona bikaruga omu karuru akatiirwe ebiiro 17/07/2025 kokuronda abanyishengyero abarakwatiire ekigombe kya NRM embera omu karuru ka boona. Omukuragirira abasingire akaruru kabakyara ba Rwampara owabaire nayebembera okuteeza akaruru aka Mutahi Jackson akabaza kuragirira Molly Asiimwe nkowasinga akaruru kwonka bwayima ya Anna Kansiima kuhakanisa ebi barangirira aho naho.
RDC Nakamya Harriet hamwe nabandi bebembezi ba Rwamapara bakaragiira oku akaruru aka kagarukwamu aho naho, ebyarugiremu Annah Kansiime bashanga oku niwe yasingire noburuuru 26347 kandi Molly akihayo 20364. Eki kikoreka oku Annah Kansiime yasingise Molly obururu 5983 kandi akihayo 55.4%.
Bwanyima y’orikukurira ebyokuteeza akaruru Mutahi Jackson kuragirira Annah Kansiime, Molly Asiimwe otwire ari omunyishengyero wabakyara ahabwa Rwampara akarugayo yahakaniisa ebyarugiire omu kuragirira kandi yaraganisa oku barikwija kukoraho abo boona abaretiire baragirira ebitaribyo.
Omu rukiiko rwebyokwerinda ahabwa Rwampara Disiturikiti orwabaireho ebiiro 19/07/2025 kandi orwayetabirwemu abebembezi ba Rwampara ahu Mutahi Jackson owarangirire ebyarugiire omu karuru nawe yabaire arimu. Akagambira abebyokwerinda hamwe nabebembezi ba Rwampara ngu ebiyarangirire bikaba biri ebyamaziima nahabwekyo abu basingire baine kwikiriza.
Obwahati abanya Rwampara nibenda mukuru weihanga abeete bamugambire amaziima ninga atahe omushonga zokwenda kubinga RDC waabo owagambire amaziima. Abamwe nibebuza oku omuntu yakusinga omu magomborora 8 nikiija kita kurugayo okagiira ngu niwe osingiire??
