BUSHENYI YAFERWA EMANZI!!!! OKUFA KWA KAROORO KUKARUGA AHA BUTANDU EI YATUNGIIRE OMU DISITURIKITI YA NEBBI
Niwe abaire atandikireho Ntambiko Crafts Centre ari aha ruguudo rwa Bushenyi Ishaka
Owaabaireho minisita kandi omu nyabutegyeki Mary Karooro Okurut afiire. Okufa kwa Karooro kwareteera abanya Bushenyi batunda obufukiriizi bwamani ahabwebirungi ebyabaire akoraire ekyanga eki. Okufa kwa Karooro kurugirire ahari butandu ei yatungire obu yabaire ari omu Disiturikiti ya Nebbi arikusherura obushagiki bw’okujwekyera abantu abakuziire omwishengyero rya Uganda . Bwanyima yokutunga butandu akatwarwa omwirwariro erya Nakasero omuri Kampala, nikwe kumwongyerayo bakamutwara omwirwariro erya Aga Khan omuri Nairobi Kenya ahu afeerire.
Butandu ei Karooro yatungiire omu disiturikiti ya Nebbi ekamurugiramu okuhendeka eigufa ry’omukifaba kandi nomubwokwo akatungamu abuzibu bwamani obumurugirireho okufa.
Karooro akaheereza omu myanya mingi omu gavumenti ya Uganda, obwe arikuba minisita wemicwe nemitwarize yabantu, minisita weby’okwerinda, minisita w’emirimo y’abantu omu offisi yenganzi yeihanga akaba ari omwegyesa kandi omuhandiiki ruranganwa.
Obwahati abebembezi ba Disiturikiti ya Bushenyi hamwe na Uganda yoona bacuramirirwa bwanyima y’okufa kwa Hon. Mary Karooro Okurut, omwebembezi w’eby’obutegyeki orikumanywa munonga, omucondooza, kandi omurwanirizi w’obugabe bwabakazi.
Akazarwa 08/07/1954 omukyaro ekya Bwatogo Cell, Central Division, Bushenyi-Ishaka Municipality. Karooro akashomera ahari Bweranyangi Junior School, Bweranyangi Girls’ Secondary School, hamwe na Trinity College Nabbingo. Omu yunivasite ya Makerere akashomerayo diiguri hamwe na master’s omuby’obuhangwa.
Akakora nk’omwegyesa aha yunivaasite ya Makerere, kandi omu 2003 akasinga akaruru kokujwekyera abakazi ba disiturikiti ya Bushenyi omwishengyero kuhisya 2021.
Omu bwire bwe, akaba minisita w’eby’amahurire, minisita w’ekikura ky’abantu, minisita w’eby’okwerinda, na minisita w’emirimo ya boona omu ofiisi y’enganzi y’eihanga. Obwire bwa covid 19 akebembera akakiiko akabaire nikakuratiira enshonga za covid19. Ahu aferiri abaire ari omuhabuzi wa puresidenti aha bikwatiraine nenkurakurana yabantu.
Oyihireho eby’obutegyeki, Karooro atwire nayejumbira munonga omu by’entunguuka y’abantu hamwe nokurwanirira obugabe bwabakazi Niwe abaire atandikireho Ntambiko Crafts Centre okushongyera eby’oburambuzi n’okurinda eby’obuhangwa. Ogu akebemberaho ekigombe ky’abeegi abashomaire ahairi Bweranyangi girls (Bweranyangi old students association), kandi niwe yatandikireho ekibiina kyabahandiiki ekya FEMRITE ekirikuhwera abakazi omu Uganda omukuhandiika ebitabo.
