EBYAFAYO BYA GODFREY TITAKIRWA OWABAIREHO MEEYA W’OKUBANZA WA MBARARA DISITURIKITI.
Akaba meeya wokubanza wa Mbarara municipalite bwanyima yokusinga akaruru kwobwa kansara arikujwekyera Kakoba
Christopher Ahimbisibwe
Godfrey Titakirwa obwahati orugiire omu magara gensi aha biro 05/01/2026 omu maka ge Kakoba Mbarara. Titakirwa atwire aine endwara ya puresha hamwe na shukari kumara obwire buraingwa. Nomwe omu ba meeya b’okubanza owategyekiire Mbarara Disiturikiti omu mwaka gwa 1984 kuhisya 1986 bwanyima y’okusinga akaruru kokuba kansara wa kakoba obwire obwo. Titakirwa akazarwa omukwezi kw’okubanza omwaka 1938 kandi ahu yaaza kurugiira omu magara g’ensi egi yaaba aine emyaka 88 y’obukuru.
Ogu akazarwa omugyenzi Yosiya Rwakininga hamwe na Yoniya Rwakininga kuruga omukyaro ekya Katereza omu gomborora eya Rugando omuri Rwampara disiturikiti.
OKUSHOMA KWE
Ekiganiiro eki twagizireho nawe omu 2018 akatworeka oku yatandiikire eishomero ari mukuru ahabw’okuba okushoma kw’obwire obwo bakaba batakukutwaramu nka kikuru. Akatandiika aine emyaka 13 ahari Kinoni primary school hati erikumanywa nka Kinoni integrated primary school. Purayimare akagiheza 1958 kandi obwire obwe ekaba nekoma aha kibiina kya mukaga (p.6).
Kuyaherize ekya mukaga nikwe kuza kwega ebyemikono ahari Kahaya memorial rural trade school obwahati erikumanywa nka Uganda technical college Bushenyi ahu yashomire okwombeka kumara emyaka 3 arikushoma mpaka omu mwaka gwa 1961.
Bwanyima y’okushoma akatunga omurimo omu Minisiture y’eby’emirimo ahari Kamukuzi Mbarara ahu yamazire omwaka arikukora. Akaija yakora na kampuni eyabaire nekora ebiharani eya Singers saw kuruga omwihanga rya Kenya ahu yabaire ari managya ahabwa branch eya Mbarara kuruga 1962 kuhisya 1968.
Omukazi we kandi owarugiire omu magara gensi omu mwaka gwa 2012, Lilian Kengongi owabaire naruga omuri Buyanja Nyabitete Rukungiri disiturikiti akaija kumutunga omu mwaka gwa 1966. Aha biro 24 omwaka 1966 bakagaitirwa omu kanisa ya Kinoni akidikonare. Omukyara we Lilian atakafiire boona bakazara abaana 8.
Ogu naija kuzikwa omu maka ge aha rwakatano ebiiro 09/01/2026 agarikushangwa Ruhunga -Kaguhanzya Kashari Mbarara.
