OBUCWEEKA 99.69% BW’ABEEGI ABASHUTAMIRE EBIGYEZO BYA S.4 2025 BAHIKIIRE
Abasiibe 12 ba Mbarara main prison babishatwire
Ainematsiko Duncan
Eraizoba minisiture y’ebyobwegyese hamwe nemizano yashooza ebyaruga omu bigyezo bya S.4 omwaka 2025. Omukoro gw’okushohoza ebigyezo ebi gwakorerwa Nakasero ahu Minisita weby’obwegyese nemizano Janet Kataaha Museveni niwe yarangirira ebigyezo ebi ebyayoreka oku bucweeka 99.69% bwabeegi abakozire ebigyezo ebi bahiikire.
Abeegi 432,163 nibo bayehandikise kushutamira ebigyezo ebi wagyeranisa n’omwaka 2024 ahu abeegi 359,417 bayehandikise. Eki nikyorekyera kimwe oku omubaaro gw’abeegi abashutamire ebigyezo by’omwaka ogu gweyongire n’omubaaro gw’abeegi 72,746 abarikukora obucweka 20.2%. Abashutamire ebigyezo by’omwaka ogu abaishiki nibingana 154,642 abarikukora obucweka 35.8% kandi aboojo baba bari 204,292 barikukora obucweka 47.3%
Abeegi 428,628 abashutamire ebigyezo ebi abarikukora obucweka 99.69% bahikire ebigyezo byomwaka ogu. Ekirikworeka ngu omwaka 2025 abeegi bakoziregye munonga ebigyezo wagyeranisa nomwaka 2024 ahu abeegi 357,120 nibo bahikire. Abeegi 1,321 nibo bataratugye satifiketi ezomwaka 2025 wagyeranisa nomwaka 2024 ahu abeegi 6,974 bagwire. Ekinikyorekyera kimwe oku omubaro gwabeegi abarikugwa gukyenderire kimwe kuruga aha bucweka 1.9% kuza aha bucweka 0.3%
Abeegi abaine oburema aha mibiiri yaabo abayehandikise kukora ebigyezo ebi nibingana 708 aboojo 342 kandi abaishiki bari 366. Embohe 52 ezayetabire omu bigyezo by’omwaka ogu babishatagwize ahu Mbarara main Prison ekashutamisa abashaija 12 kandi Luzira Upper eyashutamisa abashaija 36 hamwe nabakazi 4. Gamwe aha mashomo agu abeegi bakozire gye garimu; Christian religious Education (CRE) Geography, hamwe na English. Omuze gwokukopa ebigyezo nagwe tigubuzire ahu emishango 66 niyo erikuza okucoondozibwaho ahu abeegi bakopire ebigyezo namunonga Biology, Mathematics hamwe na Physics.
Chairman wa UNEB Prof. Celestino Obua yasiima abakozire okucoondoza aha nshomesa egi ensya kuruga 2024-2025 ahu amashomero 171 gayetabire omu kucoondoza. Okucoondoza oku nikworeka oku obucweka 93% bwa bakuru bamashomero bikirize oku karicuramu egi erikwija kuhwera abeegi kwetandikiraho ebyabo kandi purojekiti ezibarikukora ziriyo nizihindura entekateka yaabo wagyeranisa na karicuramu enkuru.
Minisita Janet Kataaha Museveni owayebembera omukoro gwokushohoza ebigyezo ebi yasiima ekitongore kyebigyezo, abazaire, bakuru bamashomero, abashomesa hamwe nabeby’okwerinda ahabwomurimo ogu bakozire obu abeegi babaire nibakora ebigyezo ebi.
Nobu Minisita yasiima okucoondoza oku abahangu bakozire aha karicuramu esya okwaba nikworeka oku karicuramu egi eriyo nekora gye. Enshonga yamashomero obutagiira ebikoresa birikumara nka; ebitabo by’okwegyesezamu abeegi, kopyuta eziine internet nizimwe aha nshonga eziriyo niziretera abeegi namashomero gatakoragye omu karicuramu egi.
