Nebya : Ainemani Albert
Kubaire kuri okushemererwa bwanyima ya Nganwa High school kusinga ekikopo kya USSSA Sheema Disiturikiti ahu bamazire emyaka 15 etakakitwara ga.
Okusinga ekikopo eki nibwanyima y’okuteera eishomero rya Savannah Secondary school 2-0 omumpira oguzanirwe aha kishanyi ekya Kabwohe. Kaputeni wa Nganwa Dada Bonga niwe atwire tiimu ya Nganwa aha businguzi bwanyima y’okubatebera goora y’okubanza omu kicweka ky’okubanza hamwe neky’akabiri.
Kurugirira ahari Mukuru weishomero Rev. James Hannington Tumwesigye ayorekiire okwesiima bwanyima y’okusinga ekikopo eki obwe arikugiira ngu “Twine okwesiima ahabw’okuhiika aha businguzi obu kandi emicwe ei tworekiire niyo etubasise kuhiika aha businguzi. Amagyezi Garya Amaani.”
Oijuke ngu Nganwa High school kuhiika aha businguzi obu nibwanyima y’okusinga Ryakasinga CHE omu semifinals ahu Nganwa yatiire Ryakasinga 1-0.
Omu gw’abaishiki Sheema Girls niyo etwire ekikopo bwanyima yokusinga Kibingo Girls obwe barikutera penariti, ahu Sheema Girls esingire na goora 4-2. Komishoona weby’emizano Rev.Canon Duncan Mugumya niwe akwasize aba Sheema Girls ekikoopo kandi aba abarabwire obutakoresa abacumba ahabwokuba ebirangiro byomumpira nibiza kubakwata.
