BIRIYOONI ZIKURENGA 4 KUHWERA EIRWARIRO RYA KISORO HOSP KUJANJABA EDWARA EZIGUMIRE
Biriyooni 4 zokwombeka eirwariro rya Kisoro
Abebembezi ba Disiturikiti ya Kisoro baine akamwenyo aha matama bwanyima ya banka yensi yoona obwe ekwatanise na Gavumenti ya Uganda ebaheraize sente zirikwingana Biriyooni 4.12B zokw’ombeka ekizimbe ekirabe kirimu obuhereza bwokuragurira endwara ezigumire.
Sente ezi banka yensi yoona ezirabize omu puroguramu eya Uganda Covid19 response and Emergency preparedness purojekiti ( UCREPP) nekigyendererwa ky’okuhwera abantu ba Kisoro hamwe naabo abarikuruga omu mahanga agabetorire abarikuba baine endwara ezirikwenda obuyambi bwaho naho.
Barikutongoza omurimo gw’okwombeka eirwariro eri ogubaire gwebembirwe Eng. George Otim ori komishona omu minisiture yebyamagara, ayorekiire oku eirwariro eri ririkuza kuhwera munonga kyahiika aha kurwanisa endwara ezakabi ezirikubarukaho aho naho ningashi ezi ayesire (infectious diseases). George Otim naagira ngu aha marwariro 39 amahango agari omwihanga otiireho 9 agari omu rwijoni empango, bakahandiika barikwenda barikushaba okubatunga obuhereza bwokubombekyera kwonka Kisoro hamwe na Isingiro Disiturikiti nibo barabiremu kutunga obuhereza obu.
Nayoreka ngu kimwe aha byaretiire Kisoro yaba niyo yatunga omugisha gwokutunga obuhereza obu nahabwokushanga ngu nibatunga abarwaire baingi barikuruga omwihanga rya DRC hamwe na Rwanda.
Omwanya ogu niguza kuba niguhwera abanya Uganda hamwe nabo abantu abarikuruga omu mahanga agaherire disiturikiti ya Kisoro agarimu Rwanda hamwe na DRC. Omurimo gw’okwombeka eirwariro eri bagukwasize ekitongore ekya Geses Uganda Limited ahu baraije kumara omwaka gumwe.
Orikwebembera eirwariro rya Kisoro Dr.Emmanuel Bahane naagira ngu eirwariro eri ryaba ryahwire nibaija kuhwerwaho munonga ahabwokuba babaire nibateganisibwa barikwohereza abarwaire omwirwariro erihango erya Kabale ahu babaire baine kutambura kiromita 75. Nayoreka ngu buraizoba eirwariro niryakiira abantu 10 abaine oburwaire oburikwenda ngu babahure ahabandi, kandi embera kwerikuba eshobire omwihanga rya Congo nibatunga barwaire barikurenga 100 burikwezi.
Abel Bizimana ori ceyamani wentebe ya katano ahabwa Kisoro hamwe na Sarah Mateke Nyirabashitsi ori omunyishengyero kandi ori sitati Minisita ahabwenshonga zebyekwerinda hamwe nabazirwineho . Basimire Gavumenti ahabwokubijuka ekabahereza ekyombeko ekiraije kukyendeza aha ndwara omuri Kisoro.
Aba niboreka ngu ebi byoona byizire obu Gavumenti ebaire yaheza kubahereza sente zirikurenga omu Miriyooni 800 zokuhunduza eirwariro eri.
