OKW’ONGYERA OMUTINDO AHABY’AMAGUZI EBIRIKUSHOHORA AHERU EIHANGA
Uganda neferwa sente nyamwingi omu katare kensi yoona ahabw’okushanga ngu eby’amaguzi ebi barikutwarayo nibiba bitari aha mutindo namunonga aby’obugaiga bw’omwitaka.
Ebi mukuru weihanga Yoweri Kaguta Museveni abigambire obu abaire naiguraho omubutongore fakitore y’okubanza omu Uganda eya Tini erabe nekyecuura amabare kwihamu ekirungo kya Tiini. Fakitore egi erikumanywa nka Wood cross tin smelting refinery eyombekirwe omu kibuga Mbarara waaba noza omu tauni y’omu Ruti aha rugundo nyigyendwa orwa Kabale Mbarara.
Puresidenti Museveni obaire ashendekyerezibwe omuhara Natasha Karugire asimire aba woodcross ahabw’okuhurikiriza omuranga ogwariho ogw’okutungura ebyamaguzi bya Uganda obwe barikwogyeramu omutindo. Puresident Museven naagira ngu bwanyima yokwetegyereza ngu gavumenti neferwa sente nyamwingi, ahaby’obugaiga bw’omwitaka ebirikushohora aheru eihanga bitari aha mutindo, akasharamu yayemereza abo boona abari omu buzinesi egyo abatarikwenda kwongyera omutindo omu bibarikushubura aheru eihanga.
Naagira ngu okugira ngu eby’obugaiga by’omwitaka babitware bitaine mutindo,kyobwe biguma omwitaka mpaka.
Kurugirira ahari Omedi Ameri orikwebembera eikorero eri, nayoreka oku obwahati akasente kabasize kweyongyera wagyeranisa nobu babaire nibatwara amabaare gonka. Nayoreka oku 1kg ya eibare rya tiini ebaire eri sh45,000, kwonka obwahati obu barikwosya eibare eryo bakihamu tiini eriyo yenyini erikukora obucweka 99.95% omukatare nibatugamu sh120,000.
Puresidenti Museveni agizire ngu eihanga ryine kwerinda abo abebembezi abari nkababangi, abashema,abarikwehanga ebibatarikubasa, abarikwehangamurira ahabwokuba abo nibarikurebya ensi ezibarikwebembera.
Bo ba minisita abari omuminisiture y’ebyobugainga bw’omwitaka abarimu Dr Ruth Nankabirwa hamwe na Phiona Nyamutoro basimire mukuru weihanga ahabw’okureba ngu agumizemu nomuranga gwe ogw’okwongyera omutindo aha byamaguzi ebirikushohora aheru eihanga.
Aba baraganise mukuru weihanga okubarikuza kukora ekirikubasiika kureba ngu ebirangiiro ebi byatekwa omunkora nekigyendererwa ky’okutungura ebyetasya omwihanga. Omukoro ogu guhendiire mukuru weihanga kurabiira omukushaba kwa Hon. Mwine Mpaka arikuhereza Sacco y’abaceyamani Lc1 bekibuga Mbarara barikutunga sh30M kandi abekanisa eya penta coastal arikubahereza sh50M.
Oijuke ngu fakitore egi niyo fakitore yokubanza omwihanga kukyencura Tiini ahu amabare agarikurugamu ekirungo eki garikuruga omu disiturikiti ya Ntungamo hamwe na Isingiro.
