ABAGYEMEKI BAMAJANI OMURI BUHWEJU KWITANIRA SENTE EZI GAVUMENTI ERIKWENDA KUBAHA

Orutaro rwa sente ezi Gavumenti erikwenda kuhereza abagyemeki bamajani hamwe naabo abagagabiire omu Disiturikiti ya Buhweju nezokubaheza ahabw’obutikirizingana obubarukireho.  Aba bwanyima  y’okumanya ngu Gavumenti neyenda kubaherezaho ebicweka 30% ebirikukora Biriyooni sh 70B kuruga aha sente ezirikwinga SH 39,973,901,000B ezi babaire baine kutunga kurugirira aha koturakiti eibakozire.

Obwahati abarikwebembera abagyeemeki hamwe nabo abagabire amajani aga tibarikurebaana  nabebembezi ba Disiturikiti ya Buhweju ahabw’okumanya ngu sente ezibariyo nibaza kutunga abamwe bakahandikiisa amajani gebishoboobo agubataragabire.

Kumanya ngu enshonga ezi zibaire kari esabiiti ehwaire abagyemeeki aba bakagiraho orukiiko aha offisi za NRM omuri Nsika Buhweju Disiturikiti aha biiro 21/11/24 aha shaaha mukaga zihangwe  nekigyendererwa ky’okumanya ahabweki abebembezi ba Disiturikiti batarikwenda kukwatanisa naabo kureba ngu batunga sente zaabo. Ekyabatangarize nokushanga ngu abakuru aha disiturikiti egi nobu batungire okumanyisibwa tihaine owayetebire omurukiiko oru kwihaho ceyamani wa NRM wenka.

Abagyemeki aba borekiire  obutashemererwa ahabw’okureba ngu ababembezi aha  Disiturikiti ababaire nibarebuza oku bakozire emirimo yokugabira abahingi amajani batarikwenda kuza omukiiko zaabo kandi obwe nibo babaire babatire aha puresha hamwe nokubarebuza. Ceyamani wa NRM ahabwa Buhweju Disiturikiti omwani Bakaija Evarlist akagyezaho kuhorereza abebembezi aba Disiturikiti egi nangwa yagumizamu nokuhabura abagyemeki aba eki bashemeraire kukora kureba ngu mukuru weihanga yatunga okwetobwaita kwabo, kwonka abamwe bakamureba nk’omuntu otarikubendeza kandi webishuba.

Oijuke ngu omukugyezaho kutunga sente zaabo obwe barikutayayira minisiture zitari zimwe nazimwe, nangwa bakahiika owa sipiika Tayebwa,hamwe nomuminisiture yebyesente, orukiiko rwaba minisita kurwashutamire enshonga zaabo mukuru weihanga yazihurira nikwe kuragira ngu nibaije kushashurwa omu bicweka bishatu. Omu kicweka kyokubanza abagyemeki nabokutunga ebicweka 30% ebirikukora sente ezirikwinga sh70B.

Abagyemeki aba nobu mukuru weihanga yabaraganise kubarikuza kutunga ebicweka 30 aha sente zaabo ezibakoraire, obwahati baine okutangara kwamani hamwe nokwebuza ahabweki omu rukarara rwa disiturikiti ezi aba minisiture barikwenda kwija kurambura hamwe nokureba amajani agagabirwe, Buhweju etarimu.

Oijuke ngu Mitoma,Bushenyi, Sheema hamwe na Buhweju nizimwe aha disiturikiti eza tungire amajani aga kwonka ekyokutangaza nokushanga ngu aga amajani agagabirwe omur Buhweju Disiturikiti nigo garikukizayo obwingi hamwe na sente. Obwahati abagyemeki aba omu rukiiko bakahinguza okuhandikira mukuru weihanga Yoweri Kaguta Museveni  barikworeka oku barikwenda aka sente akamara emyaka ebiri, kwonka abamwe abatarayenzire kugambira aha kamera zaintu bakoreka oku obushomankuzi  nibwe bwaretiire Buhweju etatunga sente ezi.

Abandi  abutwagambireho naabo nibebuza ahabweki aba Buhweju nibo bariyo nibahandiika amabaruha bwashesha bwira ngu nibashaba sente zaabo kandi obwe hariho Disiturikiti ezindi naazo ezatungire amajani nigo gamwe kwonka tibarikwihuza nkaba Buhweju.

 Zimwe aha nshonga ezi abahangu kuruga omu minisiture yeby’obuhingi, oburiisa, hamwe nobujubi ezi bashangire omu kucoondoza oku bakozire bwanyima yokutayayira Disiturikiti ya Buhweju. Bakashanga ngu amajani agu bagabiire abahingi kurugirira aha bihandiiko ebi abagyemeki bahire aba minisiture  gakaba nigakiira omubaaro gwabantu abagatungire, ekirikworeka ngu bakatamu omubaro ogurengire.

Oijuke ngu aha biiro 31/10/2022 Gavumenti ya Uganda erikurabira omu Disiturikiti eya Buhweju ekapataniisa  abagyemeki ba majani hamwe naabo ababaire nibaza kugagabira abahingi amajani  omu magomborora agarikuhiika 9 agarimu  Birere, Rubengye, Nsika T/C, Nyakishana, Nyakashaka T/C, Engaju, Kyakahenda Rwengwe, hamwe Kajani T/C omuri Buhweju Disiturikiti. Koturakiti  egi REF: BUHWE/610/SUPLS/1011- 1013/00003 ekaba eri ahansi yekitongore ekya NAADs ababaire baine omurimo gw’okuhereza abahingi  amajani.

Bwanyima yabagyemeki hamwe nababaire nibaza kugaabira abahingi  kuherezayo okushaba kwabo, aba bakaraba omu kubuzibwa okwabaire kutanguhi mpaka ahu batungire koturakiti egi. Aba bwanyima yokutunga koturakiti, bakagabira abahingi amajani agabaire nigahiika  99,934,755 kuruga okwezi kwa ikumi nakumwe kuhisya okwikumi nebiri omwaka 2022.

Ensigo zamajani ezi bagabaire abahingi hamwe na sente ezi batiire omu kuhinga amajani aga omu beedi kikareetera babanja Gavumenti sente zeirikwingana  Biriyooni SH 39,973,901,000 ezabaire ziri ezokubashashurwa bwanyima y’okumariria omurimo.

Abagyemeki hamwe naabagabire amajani aga abarikuhiika 131 obwahati batwire nibabanja Gavumenti sente zaabo ezahisya emyaka 2.