EBY’ORUTINDO RWA KATETE NIBIRANDA,BA KANSARA ABATARARIRE AHA Z’ORUTINDO BAHAGAMI KAKYEBEZI
Ba kansara abatarabagaine ezorutindo nibenda ayete kanso ashoborore ahu sente zagiire
Nobu abebembezi abarikwebembera ekibuga ekya Mbarara barugireyo barikusiima omurimo ogu ekitongore ekyamahe ekya UPDF kyakozire ahabw’okuhunduuza orutiindo rwa Katete. Abarikumanya eby’etunguka hamwe n’enkurakurana yekibuga kya Mbarara bakwasire aha matama ahabwokushoberwa.
Orutindo rwa Katete bwanyima y’okumara ameezi 10 rukingire abantu bakagiira ebininga namunonga abo abarikutura Katete ahabw’okuba bakaba nibetorora Nyamitanga nangwa bahiika naha kwenda kwihamu meeya wekibuga kya Mbarara Kakyebezi obwesigye ngu aremirwe kubakorera orutiindo.
Amakuru marungi kuruga omu Gavumenti gakarugayo garikworeka oku sente zirikwingana miriyooni 500 zahirweyo kuhunduza orutindo oru kandi ekitongore ekya UPDF nikyo kyakwasire omurimo gwokuhunduza orutindo oru ahabwa miriyooni 360, omurimo ogwabaire guri ogw’okumara ameezi ashatu kwonka bakagukorera okwezi kumwe.
Barikwigura orutindo oru abantu bakoreka okushemererwa nangwa nabandi bahiika nahakurahiira ngu Meya Kakyebezi agumeho mpaka. Esabiti ibiri baherize kwigura orutindo oru abantu bagwerirwe akakgwe bwanyima yokureba omurimo gwekishobobo ogu UPDF yakozire.
Kurugirira ahari Kansara Kajubi Moses naagira ngu eki abebembezi ba Mbarara bakwatanise nekitongore kya UPDF bakozire tikikabahoga omunsi ya Uganda. Omu bigambo bye agizire ngu “ Kuruga batandiika kuhunduza orutindo oru, tutwire nituhandiika buri kimwe ekibaire nikikorwa aha rutindo oru. Bakakoresa amabati 32 hamwe nembaho 86 byoona ebitarikumaraho miriyooni 50”. Obwahati emisumari eibakwatise amabati yoona yarugireyo ahu abavugi bemotoka hamwe naba boda emipiira yatandikire kubaruka ahabwemisumari.
Kurugirira ahari Maj Francis Rugasira obaire akurire ekitongore ekya UPDF ayorekire oku bakozire ekirikubasiika kureba ngu bagaruzaho entambura nungi aha rutindo oru omu bwire bukye nkoku abebembezi bekibuga kya Mbarara bebembirwe town clerk hamwe na meeya bashabire obwe barikukoresa miriyooni 360.
Obwahati wahiika aha rutindo oru bakakugiira ngu miriyooni 360 nizo zahweraire aha rutindo oru nokwata aha munwa. Amakuru agamwe agu tutungire nigoreka oku bakansara bekibuga ekya Mbarara babagaine sente zorutindo zirikurenga omu Miriyooni 10 buryomwe nikyo orikurebera ngu tibarikubasa kurugayo bakagiira ekibagamba.
Aha mukoro gw’okutongoza orutindo oru ori omujwekyerwa wa puresidenti omukyara Catherine Kamwine akaga kwigura orutindo oru omu butongore obwe arikugira ngu baine kubaza bayetegyereza oku emirimo yakwozirwe.
Jomo Mugabi ori Meeya ahabwa Mbarara city south aha mukoro nigwe gumwe akabuza ahu balance ya miriyooni 140 ahu zagiire ahabw’okuba gavumenti ekaba esindikire miriyooni 500 kukora orutindo rwa Katete ahu UPDF yashabire 360.
Kakyebezi arikugyezaho kwehozaho akoreka oku sente ezasigaire zirikuza kwombeka orutindo orwa Kanyeyite orurikugaita Kakoba Divijoni ahari Nyamitanga. Nobu Meeya yagambire ebyo tarayorekiire oku babaire nibaza kukora orutindo orwe.
Obwahati ba Kansara abatungire aha sente zorutindo boona obwahati wababuza ebikwasire aha rutindo rwa Katete noshusha ngu tibarikumanya kugamba. Abantura bekibuga Mbarara obwahati nibenda ekitongore ekirikucoodoza aha bushomankuzi ekya State house anti-corruption unit kitahe omushonga zorutindo rwa Katete nkuku rwakozirwe hamwe na sente ezahwarireho.
