OKUFA KWA FRED KAJOBA ABAIRE ARI OMUTENDEKI W’AMANI AHA BAKWASI BA GOORO

Amakuru g’okufa kwa Fred Kajoba eizoba ry’orwokubanza ebiiro 13/05/2024 garekire enkunzi zemizano omwihanga rya Uganda bashobangirirwe hamwe nobusasi bwingi obwe barikwebuza noha oraije kuza omubigyerebe? Fred Kajoba obaire ari omutendeki wabakwasi ba goola owamani omwihanga rya Uganda aferire omwihanga rya Tanzania bwanyima y’okumutwara omwirwariro ahu aferire.

Fred Kajoba emyaka 55 y’obukuru atwire omwihanga rya Tanzania ahu abaire nakorera emirimo ye y’okutendeka abakwasi ba gooro omutimu eya Ihefu SC. Kajoba n’omutendeki ou baingi babaire nibamanya nk’omuntu orikugamba ekimuri aha mutiima kandi omuntu obaire namanywa munonga kyahiika aha kujwara esapuri ye ebaire etakumuruga mumaraka.

Oijuke ngu omu bwire bwa Covid19 Fred Kajoba  akaija kubingwa omutendeki wa tiimu eihanga Jonathan McKinstry bwanyima y’okuruga omu kampu akagyenda kushaba atashabire orusa. Bwanyima yokumubuza ahabweki yaruga omu kampu atashabire rusa, akoreka oku yabaire ataine kushaba orusa omuntu weena yaaba naza kushaba Ruhanga.

Ahu agiire kufera abaire arikutendeka abakwasi ba gooro omu tiimu ya  Ihefu SC eri omu premier league ya Tanzania. Zimwe aha tiimu ezi atendekire abakwasi ba goola harimu Simba, Bright stars, Vipers hamwe na tiimu eihanga eya Uganda Cranes namunonga omukwasi wa goola ruranganwa Denis Onyango ou yatendekiire kumara obwire buraingwa kandi obaire nayesimisa eihanga.

Kurugirira ahari Matia Lule omutendeki w’omupiira omu tiimu neyo emwe naagira ngu Fred Kajoba akamugambira okwabaire nashasha kandi okwarikwetenga okuragurirwa, nikwe kumushendekyereza akamutwara omwirwariro kutunga obujanjabi. Kwonka kubwasheshire ruri orw’okubanza Kajoba yagaruka yaterera Lule arikumugira ngu nahurira nashasha, nikwe kugaruka akamutwara omwirwariro akamusigayo barikumucebera.

Ahabw’okushanga ngu babaire baineho omupiira aha shaaha munana zihangwa, Lule akagarukayo kutereza omuzano ogubaizire kuhangura ahari 1-0. Nabwanyima y’omuzano kuhwa, Lule akaija kutunga amakuru oku barikwenda omwirwariro ahabw’okuba Kajoba amagara garema.

Enteka teka z’okwiha omubiri gwa Fred Kajoba omwihanga rya Tanzania ziriyo nizigyenda omumaisho hamwe nez’okumushendekyereza. Oijuke ngu Fred Kajoba akazarwa ebiiro 5/05/1969.