OMUZANI WA LIVERPOOL DIOGO JOTA NOMURUMUNA ANDRE BAFERA OMU BUTANDU

Nebya: Namaara Lilian

Omuzaani wa tiimu yomupiira eya Liverpool, Diogo Jota emyaka 28 yobukuru  kuruga omwihanga rya Portugal yafeera omu butandu obu yaba navuuga motoka yekiika kya Lamborghini aha ruguuto omumatemba ga Spain. Butandu egi yabaho omu shaaha zakasheeshe kandi omu mutoka egi yaba ainemu omurumuna Andre Silva emyaka 26 yobukuru.

Kurugirira aha makuru nigoreka oku emotoka ei babaire nibavuga eyatikiire omupiira nikwe kuruga aha nguuto bwanyima ekakwatwa omuririro. Ebiiro 22 /06/ 2025 Diogo akarebuka arikugaitwa nomukundwa we  Ruta Cardoso ou yabaire amaziire nawe obwire buraingwa kandi amwinemu abaana bashatu.

Tiimu ya Liverpool ei Diogo abaire nazaniramu yayoreka okushasha kwamani ahabwo’kuferwa Jota ou baguzire kuruga omuri Wolves obukaikuru bwa pawundi 41 omu 2020. Ogu atebiire Liverpool goora 65 omu mizaano 182. Diogo ahweraire tiimu ya Liverpool okusigura ekikoopo ekya FA, hamwe nekya premier sizoni ehawaire.

Tiimu ya Wolves ahu Jota arugiire arikuza omu Liverpool bwanyima yokuhurira amakuru gwokufa kwe yahandiika aha mukutu gwayo: “Emitima yaitu ehendekire.”. “Diogo akakundwa abahagizi baitu, yakundwa bataahi be, kandi buri omwe owaakozire nawe akamukunda. Ebintu ebi yaakozire tibirikwija kwebwa.”.

Ekitongore ky’omupiira ekya Portugal (FPF) hamwe n’omupiira gw’ebigyere gwa Portugal gwona nabo bayoreka okushasha obwe barikuherezayo obutumwa obu; “aha muzaani orikutangaaza, Diogo Jota abaire ari omuntu w’omutaano, arikuheebwa ekitiinisa ab’omu tiimu hamwe ,omuntu obaire aine  okushemererwa. Okufa kwa Diogo na Andre Silva nikimanyisa okufeerwa okutarikubaasa kugarurwaho omu mupiira gwa Portugal, kandi nitwija kukora kyona ekirikubaasika okuheereza ekitinisa omurimo gwabo burizooba.

“Ekitongore ekirikutegyeka omupiira omuri Buraaya ekya Uefa kihamize ngu nihaza kubaho okwisirika kumara edakiika emwe, Portugal etakatandikire omuzaano gw’abakazi ogwa Yuro na Spain aha rwakana.