OKUTUNGURA ENTASYA Y’ABAKYARA ,ABA DFCU BANK BATONGWIZEHO OBUHEREZA OBUSYA BWA GROW INITIATIVE
Abakyara barikurenga 200 batungire okwegyesibwa okubakubasa kutungura bizinesi omukibuga Mbarara
Nkomuringo gumwe gw’okuhwera abakyara kutunguka omu by’obushubuzi bank ya DFCU etongwizeho obuhereza busya oburikumanywa nka; Grow Initiative oburikwija kuhwera abakyara abari omuby’obushubuzi kutunga sente z’okwetungura. Omukoro gw’okutongoza obuhereza obu gubaire omu kibuga ekya Mbarara aha biiro 04/10/2024 ahu abakayara abari omuby’obushubuzi, abebembezi bekibuga kya Mbarara bahikire aha mukoro ogu.
Annette Kiconco kuruga omu DFCU Banka naagira ngu abakyara omu buregye rwaizoba bakozire omurimo muhango gw’okutungura amaka gaabo obwe barikwejumbira omuby’obushubuuzi. Eki nikyo kigyemeseraize banka kuretaho obuhereza busya obwa GROW oburaije kuhwera abakyara abari omuby’obushubuzi kutunga sente zokukoresa ezi orikutekamu amagoba makye agarikwingana 10% buri mwaka kurugirira aha sente eziwayehora.
Aba DFCU tibarikuhereza abakyara sente z’okushubuura kwonka kureka nibagumizamu babahereza nobukodyo oburikubahwera kukoresa gye sente omu buzinesi zaabo nka; obukodyo omu kubiika ebihandiiko bya bizinesi yawe, okwega ebyobushubuuzi hamwe nebindi. Obuhereza obwa GROW tibwe bwonka obu banka ya DFCU eresiire kureka nibogyesereza aha puroguram,u ezindi yamwingi ezibatwire baine ezigyenderaire kutungura abakyara kuruga emyaka yoona.
Barikutongoza Obuhereza obu ori, omujwekyerwa wa Mukuru weihanga Ahabwe kibuga ekya Mbarara omukyara Catherine Kamwine asiimire aba DFCU ahabw’okureta obuhereza busya obugyenderaire kutungura abakyara obwe barikutunga sente zokutandikisa kandi ezitaine magoba maingi. Nayoreka oku enkora egi erikwija kuhwera abakyara baingi omu rurembo rwa Mbarara namunonga abo abari omu bya bizinesi.
Wendy Lalum omukyara omuhangu omubya bisinesi kandi orikukora nekitongore ekya Private sector foundation (PSFU) naagira ngu ekigyendererwa kyokureteho obuhereza obu, nokwenda kushagika abakyara abari omu bizinesi kwenda ngu barugye omwidaara eri barimu baze omwidara erindi.
Okucondooza nikworeka oku Uganda niyo erikukizayo abantu abarikutandiika bizinesi nyingi omu mahanga ga Afirika nobucweka 44% bw’abantu barikwejumbira omukukora bizinesi, kwonka ekirikutangaza nokushanga ngu obucweka 80% bwa bizinesi ezibarikuba batandikireho tizirikuhangara. Eki nikyo kigyemeseraize DFCU kutandikaho obuhereza bwa GROW nekigyendererwa kyokukwatiraho abashubuuzi kuguma omu bizinesi ezibarikuba batandikire obwe barikubahereza obukodyo hamwe namagyezi agokutungura bizinesi zaabo.
Bwanyima yokutongozaho obuhereza obu omu kibuga Mbarara, DFCU banka egizireho omushomo ahu abakyara abashubuzi barikurenga 200 batungire okwegyesibwa okubakubasa kutungura bizinesi zaabo.
