Kubaire kuri okushemererwa eizoba ryorwamukaga ebiiro 06.04.2024 obu orikwebembera ekigombe kya firimu ekya Abanyakitara film production ei baingi barikumanya nka Mushana production abaire nagaitwa. Nuwagaba Amos Mushana ou baingi barikumanya nka Kashanku agisirwe nomukundwa we Ninsiima Moreen aha kaniisa ya All Saints Mbarara kandi omukoro ogu guhikirweho enkuyanja yabantu
kuruga enshonda zoona omwihanga.
Okugaitwa kwa Mushana kutangarize baingi nangwa nabamwe bahiika aha kutekateka ngu omukazi ou arikuzana nawe firimu ou baingi barikumanya nka Allen ninga shi mabunu niwe owagisirwe nawe. Bwanyima yokuteera ebiragano byabo abagore hamwe nenshagarizi bahikire omu maka Mushana agarikushangwa omuri Kashenyi Isingiro kushemererwa nawe.
Ishabareberezi wekaniisa ya Uganda owahumwire Stanley Ntagari niwe abaire ari omugyenyi mukuru aha mukoro ogu kandi asimire Mushana ahabwokworeka entarata ei Ruhanga yamuhaire kuruga omu buto kuhisya nahati obu emuhindwire ow’omutano.
Nuwaga Amos Mushana ou baingi barikumanya nka Kashanku kwaimukire kugamba ebikumukwataho aretiire bingi bakwatwa enaku bwanyima yokuhurikiriza ebyarabiremu kuhiika ahari obwahati.
Nuwagaba Amos Mushana nomukundwa we Nisiimire Moreen bwanyima y’okugaitwa
EBY’OKUZARWA KWE
Nuwagaba Amos Mushana akazarwa ebiiro 13.06.1982 obwahati aine emyaka 42 y’obukuru. Ogu akazarirwa omuri Buyanja Rukungiri Disiturikiti. Nyina akaba nayetwa Molly owarugire omu magara gensi owabaire ashwirwe omuka yabatungi. Mushana naagira ngu bwanyima y’okuzarwa ou yakwesire ishe akamw’ehakana nangwa yahiika nahakwenda kumwita ngu ahabw’okuba akaba ari omwana w’ekinyandaro. Aho niho nyina kimuzara yamuhire eiziina Rwentaro ahabwokuba ebibabire nibarabamu zikaba ziri entaro zonka.
Eizoba rimwe Mushana naagira ngu Ishe nya’kumuzara akabugana nyina amwine nikwe kwihayo enkoni ngu amwite eki nyina yakozire ekirikubasika akamuhuzya n’obu nyamushaija yatiire nyina akamuhenda omukono. Kuruga obwo Mushana hamwe na nyina bakatandiika enaku eibabire batakarebaga eyamuretire yaruga omwishomero aha P.2. Abany’ambabazi kuruga omuri Buyanja nibo bagumire nibamuhwera nikwe kuza Rukungiri P/sch ahu yaheraize ekibiina kya Mushanju.OKUYATANDIKIRE KUZAANA EMIZANOMushana naagira ngu omu buto bwe akaba nakunda kuba naazana omuzano arikuzana nk’omwahure ekintu eki yakuzire erikwegomba . Eki n’okirebera omu mizano eibizire nibazaana ahu azanire nk’omwahure.
Omwaka 2008 akahikirira muywani we omuri Kampala owabaire ari omuzani wa firimu. Munywani we
akamugambira okuyatungire obukugu kuruga omwihanga rya Thailand. Aho Mushana akakora ekirikubasiika kutunga ebihandiiko by’okumwikiriza kuza omwihanga rya Thailand ekitarabasikire. Naagira ngu akakoresa emihanda endaijo obwe arikuyambwaho munywani we nikwe kukoresa emihanda endaijo eyabahikize omwihanga rya Thailand.Ahabwokugira ebihandiiko ebyabaire bitahikire Mushana namugyenzi we bakabakwata babakoma kumara ameezi 6 batarikumanya ekirikugyenda omu maisho. Naagira ngu akareba enaku owmihanga eryo eyatakarebaga nangwa yihamu noburwaire obu atagambire. Bwanyima yameezi 6 bakaija bamurekura nikwe kugaruka omu Uganda arikurabira omwihanga rya Tanzania. Munywani we owamuhwerire kuza Thailand kandi tarikumanya ogwamutwire nahati. Aha niho Mushana ashabire abazaire hamwe neminyeto okwetantara ebigombe ebirikutwara abaana aheru ninga shi omuntu kukutwara aheru otiine bihandiiko ebihikire, noba waaza omugehena. Kuwarugire aheru Mushana akagaruka omuri Kampala yatandiika kweyiya hamwe nokuza omu bigombe bitari
bimwe nabimwe by’okuzana emizano.Okuruga omubworo, Mushana eizoba rimwe akaba navuga emotoka ye ekuzire kuyabaire yahika omu mwanya gumwe nikwe kushanga basiire ecupa . Kuyabaire yaheza kuzitorotora ngu zitacumita emipira ya motoka hamwe nabaana ababaire nibaruga ahishomero. Omujungu omwe owabaire aizire omu Uganda
Kurambura niwe yamugirire embabazi akamushaba kwaija akamubugana aha kishayi kyenyonyi Entebbe. Omujungu ou Mushana nobwahati atakwijuka gye akamuhereza sente zirikuhiika 100M ngu aze kugura motoka, kwonka we akaruga aha yagura amataka omuri Kampala. Aha niho Mushana agambiire abantu ngu “Okuwazairwe Tikikuru”
