ENDWARA YAMAISHO AGARIKUTUKURA EBARUKIRE OMURI BUSHENYI DISITURKITI.
Nebya: Bruno Mugizi.
Bwanyima yekitongore kyebyamagara omwihanga rya Uganda kurangirira oku habarukireho endwara ya maisho agarikuhinduka gakatukura omuri Kampala. Obwahati endwara egi ebarukireho omuri Bushenyi kurugirira ahari mukuru weby’amagara.
Kurugirira ahari Dr. Mwesigye Edward orikukurira ebyamagara omu disiturikiti ya Bushenyi, naagira ngu batungire abarwaire abaine obubonero bwendwara egi omu magomborora agarimu Kyeizoba, Nyabubare, Kizinda-Kigoma tauni kanso, Rwentuha tauni kanso hamwe na Bushenyi-Ishaka Munisiparite
Oijuke ngu obwahati kurugirira aha minisiture yebyamagara abantu barikurenga 7500 batungire endwara egi omwihanga. Kurugirira ahari Dr. Kyabayeze Daniel noreka oku abantu barikwingana 7596 bashangirwe noburwaire obu omwihanga ahu ekitongore kyamakomera kirikukizayo omubaro gwabntu abaine endwara egi gurikuhika 5897 ekirikukora obucweka 78%. Minisiture yebyamagara neyoreka oku yatungire abantu abaine oburwaire obu omu bihome ebirimu Kaweeri, Lira, Eruti hamwe na Kampala.
Obwahati mukuru webyamagara omu disiturikiti eya Bushenyi nayenda bakama bamashomero hamwe namarwariro kuzoora amaisho, hagiira omuntu weena owakwatwa endwara egi bamurahusye ninga arahukye kuza omwirwariro.
Robert Atuhairwe ori omujwekyerwa wa puresidenti omuri Bushenyi nashaba abantu kwehara okukwata abandi omungaro kandi nokwetegyereza abagyenyi abarikwija kubatayayira. Bumwe aha bubonero oburikworeka oku omuntu aine endwara egi burimu; amaisho kuhinduka gakaba agokutukura, okushanga omuntu arikwagura amaisho eshaaha yoona. Okugiira amahiira agarikuruga omu maisho hamwe nobubonero obundi.
Endwara egi nebasa kuragurirwa kandi okiire ahabwokuba abasibe barikwingana 4858 ababaire baine endwara egi bakizire nobu abandi abarikuhiika 1044 bakiri omu mwanya ogweherire barikutunga obujanjabi.
