RAY G AKOZIRE EKYAFAYO OMURI KAMPALA!!!
Niwe mweshongozi wokubanza kuruga Buregye Rwaizoba kwijuzya Lugogo Cricket Oval
Omweshongozo Ray G akoziire akyafayo nangwa ekitakabahoga kushanga omweshongozi kuruga buregye rwaizoba nakora ekivuuru omu kibuga Kampala kikakwatayo. Aha biiro 10/05/2024 eihanga ryoona rikarebera okutangara nangwa nabeshongozi abandi bakwata aha munwa bwanyima yokureba eki Ray G yakozire omukibuga Kampala bwanyima yabantu kwijuura omu kishanyi ekya Cricket Oval Lugogo bagiire kumureba.
Kurugirira aha berebire nagabo nangwa naabo abarikumanya ebyabeshongozi niboreka oku abantu barikuhiika emitwaro eshatu nibo bahikire Lugogo kwerebera Ray G. Omuhwezi wa sipiika weishengyero rya Uganda Thomas Tayebwa niwe abaire ari omugyenyi mukuru kandi ogu asimire Ray G okuba omweshongozi murungi orikwihayo orurimi rworunyankore kandi orutiire aha map.
Omwanya gwa Lugogo abeshongozi baingi omu Uganda namunonga aba Kampala babaire nibakira kukoresa omwanya ogu kweshongoreramu, kwonka ekyokutangaza nokushanga ngu abeshongozi abu turikumanya nkabamani omu Uganda abamwe tibakakoraga eki Ray G akoziire bwanyima yokwijuzya omwanya ogu gukaboga. Abarikucoondoza enshonga zabeshongozi omwihanga niboreka ngu ebyivuuru ebihererukiire kugiira abantu baingi nkaba Ray G, akaba harimu ekivuuru ekya Fik Faimaca ekiyakoraire omu mwanya nigwe gumwe ekivuuru ahagati ya Cindy Sanyu hamwe na Sheeba reru ekyahererukire kikaba kiri ekya Winnie Nwagi.
Obwahati abahangu omu kubaara ebivuuru byabeshongozi omwihanga niboreka oku ekivuuru kya Ray G hamwe na Winnie Nwagi nibyo ebivuuru ebihenzire rwikodi obwe birikugira abantu nyamwingi ahari Lugogo.
Ekivuuru kya Ray G kitakahikire hatwireho orugambo kuruga omu bantu namunonga aba Kampala abatari bamwe nabamwe barikugiira ngu ekivuuru eki tikiraije kukwatayo ahabwokuba Ray G akoreka obutakwatanisa nomweshongozi Azawi obwaija omukibuga Mbarara kweshongora. Enshonga za Ray G hamwe na Azawi zikakwatayo nangwa Ray G yaija yayoreka okugarukana kwe na Azawi obwe barikworeka ebishushani aha mikutu yaabo barihamwe.
Bamwe ahabanyishengyero abahikire Lugogo kushemererwa nabandi habaire harimu Sipiika weishengyero Hon. Thomas Tayebwa, Hon. Mwine Mpaka, Hon. Mwijukye Francis,Hon. Dickson Kateshubwa hamwe bandi baingi
Abeshongozi kuruga omu buregye rwaizoba abarimu Sister Charity, T. Paul, Rasta Chazi,Fact zamani nabo begisire aha ba Kampala ababaire barimu Spice Diana, Azawi, ziza bafana, Levixon hamwe na Truth 256. Omweshongozi Kachaina hamwe na Kacheche nabo tibabuzire aha mukoro obwe Kachaina ashemaize abantu ba Kampala nebyokushesya.
Obwahati omweshongozi Ray G ou ba buregye rwaizoba babaire nibareba nkomweshongozi wa Mbarara obwahati abatiire akadanyima takiri waburaijo kureka nomweshongozi wa Uganda kandi owamani. Niwe abaire omweshongozi wokubanza kuruga buregye rwaizoba kweshongorera omuri Kampala akijuzya ekishayi eki abasheongozi abarikutura kampala baremirwe.
Abantu kukunda ebyeshongoro bya Ray G tikitandikire nyimwazyo ninga hati kureka abantu batwire nibakunda ebyeshongore bye. Kuruga Ray G akora ekivuuru kye ekyokubanza omu Agip Motel Mbarara omu 2019 takagarukaga enyima nokuhisya nahati ahu ahenzire rwikodi. Abanyishengyero kuruga buregye rwaizoba nabo bahikiire aha mukoro gwa Ray G kumushagika.
Ebaruha ei Ray G yahandiika aha mukutu gwe ogwa X yasiima abantu boona abamushagikire akabasa kukora ekivuuru ekisingire ebindi byoona omwaka ogu kandi omuri Kampala.
