OTAINE KIGOMBE KYEBY’OBUTEGYEKI AHUSIIRE AKA KISORO ABA NRM BATANDIIKA KWEKWASA NGU NOWAABO!!!!!!!
Byaguma biti omu NRM omu karuru akarikwija 2026 omubaro gw'abanyishengyero abataine kigobe niguza kweyongyera
Aha shaaha mushaju zekiiro burikushesha eraizoba orikwebembera eby’okuteza obururu Nayebare Daniel omu Disiturikiti ya Kisoro yarangirira Akifeza Ngabirano nkomuhanguzi.
Akifeza Ngabirano niwe asigiire akaruru komukyara omunyishengyero orikujwekyera abantu aba Kisoro bwanyima yokwesimba nowa NRM akamukuringa omwitaka. Akifeza obaire ayesimbire nk’omuntu bwanyima y’okumusinga omu karuru aka NRM primary ahu Rose Kabagenyi abaire aine ebendera ya NRM.
Akifeza atungire obururu oburikwingana 50,459 kandi owa NRM yatunga 44,982 ekiretiire Akifeza yasingiza owa NRM obururu burikuhika 5,477. Oijuke ngu nobu Akifeza abaire ataine kigombe ekyaiziremu, kwonka owabaireho minisita Philemon Mateke emyaka 90 ekikongi kya NRM abaire nahagira omukyara ogu.
Oijuke okugaruka omu karuru ka Kisoro nibwanyima y’omunyishengyero Sarah Mateke kuruga omu magara gensi aha biiro 07/09/2024. Abandi ababaire besimbire habaire harimu Juliet Musanse owa FDC otungire obururu 1093, Mable Ingabire owa UPC 362, Salim Sultana owa NUP otungire 903 hamwe na Cympaye Aisha owa PPP otungire obururu 157
Ekirikutangaza kandi kikashwazana nokushanga ngu nobu mukuru weihanga yakwasize ebendera ya NRM omukyara Rose Kabagenyi kuba niwe bashagiika, abebembezi baingi kuruga omu NRM babaire nibahagiira Akifeza barikworeka ngu nawe nowa NRM.
Aha mukoro nigwe gumwe obu mukuru weihanga aba ari omuri Kisoro arikurondera obushagiki Rose, Akifeza nawe akahiika aha mukuro nigwe gumwe kandi yayoreka mukuru weihanga obushagiki obuyabaire aine bwanyima yabantu kumwaniriza nakari kamani.
Ogu bwanyima yokumurangirira nkomusinguzi asiimire abantu boona abamushagikire bakamuhwera kureba ngu akaruru aka yakasinga.Naagira ngu naija kukwatanisa naabo abu abaire ayesimbire nabo kureba ngu bareta entuguka omuri Kisoro
Ahabw’obushomakuzi oburi omu karuru ka NRM primaries baingi abu barikuba basingire nibarugayo besimba nkabantu buntu kandi basing akaruru. Eki nikyorekyera kimwe obutari buringaniza kyahiika aha kuronda orikukwatira NRM ebendera.
Obwahati omwishengyero rya Uganda harimu abanyishengyero abataine kibiina kyoona abarikwingana 69 kandi aba abaingi bakaruga omu NRM bwanyima y’okubasinga.
Eki nikimanyisa ngu byaguma biti, omu karuru akomwaka 2026 abanyishengyero abaraije nka bantu buntu nibaija kweyongyera omubaro kandi aba abaingi nibaza kuba bari abu basingire omu karuru ka NRM.
