PURESIDENTI MUSEVENI AHAKANISE EBI KOOTI EKIIRA ZOONA YACWIREMU
Okwe tikwe NRA erikwebembera eihanga kandi tituraije kwikiriza
Eizoba ry’orwakatano ebiiro 31/01/2025 eihanga ryoona ribaire ritegyeraize eki kooti ekiira zoona erasharamu aha mushango gwa Attoney General Vs Micheal Kabaziguruka. Kabaziguruka bwanyima yokumutwara omu Kooti yekinyamahe kuba niho yahoreza emishango ye, akaija yahakanisa ekikorwa eki ekya kooti yamahe kuba niyo yahurikiriza emishango ye kandi obwe Atari wamahe.
Kurabiira omu ba rooya be akatayo okushaba kwe omu kooti ekiira zoona obwe arikushaba Kooti ekiira zoona kutaha omunshonga ekaba niyo yahurikiriza orubanja rwe.
Bwanyima yemyaka kuhingurwaho nangwa nabamwe omubarikumanya ebirangiro bakoreka oku ekitongore ekiramuzi kirimu obunafu bwamani bw’obutasharamu. Eizoba rya nyimwazyo Ishe-Abaramuzi, Alfonse Owiny-Dollo hamwe nabandi 5 bashutamire omu mushango ogu bahinguza ngu emishango yoona ey’abantu ba buriijo eriyo nehozesibwa omu kooti y’ekinyamahe eihweyo kandi etwarwe omu kooti eza buriijo aho-naaho.
Kooti ekiira zoona eyorekiire oku kooti y’ekinyamahe etaine bushobororozi bw’okuhozese emishango ahabw’okuba tihaine ahu kihandikire omu biragiiro byamateka. Omukucwamu omushango ogu abaramuzi aba borekiire oku abaserukare abarikushutama omu kooti yekinyamahe oku bataine bukugu burikumara kyahiika aha kumanya hamwe nokutendekwa oku ebiragiiro byihanga bishemeraire kutwazibwa omu mateka.
Nikwe kubashaba baba nibenda kooti egi egumeho, baine kutendeka ninga kuronda abantu abashomire amateka kuhurikiriza emishango hamwe nokucwamu ebibonerezo.
Mukuru weihanga otwire omu kurambura omu matemba geihanga omu rwijoni eya Lango hamwe na Busonga oku puroguramu eya parish development modal ( PDM) ehweraire abanya Uganda. Kwagiire kugaruka Kampala nikwe kushanga amakuru marungi agu kooti ecwiremu.
Bwanyima yokuhurikiriza ebi kooti ekiira zoona ecwiremu, Puresidenti Museveni arugireyo yahandiika ekihandiiko kihango arikworeka obutashemererwa hamwe nokuhakanisa ebi kooti eki eshaziremu. Museveni nayoreka oku agwerirwe akagwe bwanyima yokuhurira ngu abaramuzi bashaziremu ngu abantu ababuraijo abarikushangwa baine embudu omu bihenda birangiro batatwarwa omu kooti yekinyamahe kuhozesibwa. Omu bigambo bye naagira ngu “ ku orabe otari muserukare ninga omu poriisi, embudu noba noyenda eyaki? Kandi obwe ekyokutangaza noshanga ngu ogiine omu bihenda birangiro?”
