AMAGARA GA BESIGYE NIGERARIKIRIZA, ABASHAHO OMWIHANGA NIBENDA BESIGYE AREKURWE AZE KUTUNGA OBUJANJABI
Abashaho abarikwegitiira omu kigombe kyabo ekya Uganda medical Association (UMA) nibenda Gavumenti erekure RTD.Col.Dr. Kiiza Besigye arugye omukihome Luzira aze kutunga obujanjabi oburikumara nkoku kishemeraire. Abashaho aba barikubuganaho abanyamakuru boreka okushasha kushanga ngu omushaho mugyezi waabo nahiika aha mbera nkegi yokumwima orusa rwokutunga obujanjabi. Ebi byoona byizireho bwanyima ya Besigye kuretwa omu kooti ari omumbera mbi munonga. Abashaho bayongyera bayoreka oku amateka agarikwebembera eihanga eri garikuhereza omuntu Weena obugabe bwokutunga obujanjabi, nahabwekyo tibashemeraire kuribatirira obugabe bwa Besigye.
Obwahati abashaho aba nibenda abarikwebembera ebihome, ekitongore ekiramuzi,hamwe na Ishengyero rya Uganda barugyeyo aho naho barebe ngu Besigye yarekurwa kandi yatunga abashaho abakugu kumujanjaba.
Ahabwembera mbi ei Besigye arikurabamu ogu bamwirukangize omukarwariro omuri Bugolobi kutunga obujanjabi hamwe nokumukyebera. Aha nshonga egi Dr. Chris Baryomunsi omugambirizi wa Gavumenti ya Uganda obasize kutayayira Besigye omukihome Luzira, naagira ngu embera ei Besigye arimu nahabwokushanga ngu akanga kurya. Eki nikyo kimuretire yagiira amani makye, nikwe kushaba abashaho abarikumurakurira kumushaba akatandiika kurya ebyokurya.
Obwahati abantu bataribamwe nabamwe, ebigombe byobutegyeki, abanyabuzare omwihanga ryoona batandiika kwesharinga barikworeka obutari buringaniza ahabwobutarekura Besigye ( #FREE BESIGYE) bwanyima ya kooti erikukirayo kucwamu ngu kooti yamahe taine bushoborozi bwoona bwokuhurikiriza emishango yabantu baburaijo. Kwonka kuruga obwe nokuhisya nahati ekitongore kyamahe, ekyebihome hamwe na Gavumenti amatu bakagatamu ebiti bayanga kuhurikiriza eki Kooti yashaziremu.
Abarikuhangira ekiibina ekya PFF omuri Bushenyi bayoreka obutari buringaniza obwe barikushaba Gavumenti kwerekura Besigye. Aba bakwata ebipande obwe barikutambura omu tauni eya Bushenyi.
