OMURUNDI GWA 7 PURESIDENTI MUSEVENI ARIKURAHIIRA NKA MUKURU WEIHANGA
Mukuru weihanga yarahiira ataine mukaziwe Janet Kataha Museveni yaaba ashendekyerezibwe omuhara
Aha shaaha 10:55am zakasheshe mukuru weihanga yahiika aha kishayi Kololo ahu enkuyanja yabahagizi bekibiina kya NRM hamwe nabebembezi bamahanga agarimu DRC, Burundi, Rwanda, Kenya ,Somalia Tanzania,Zimbabwe, Ethiopia ,South Sudan, Garbon, Nigeria abahiika aha mukoro.
Puresidenti Museveni yahiika aha kishayi Kololo kandi yayakirwa omuhwezi wa puresidenti Maj Jessica Alupo, Sipiika weishengyero, orikwebembera ebihome omwihanga, komanda wamahe ga Uganda hamwe nabandi. Bwanyima y’okumwakiira mukuru weihanga ashendekyerezibwe komanda wamahe Gen Muhoozi Kainerugaba bamurambuza parendi yayebemberwa Brig Gen John Bosco Asinguza.
Omuramuzi Byabakama aha mukoro yarangirira omubutongore oku puresidenti Musevini yasingire akaruru aha biiro 17/01/2026 nobucweka 71.6%. obwe arikusinga abandi 8 abu yabaire ayesimbire naabo.Nikwe kusiima abanya Uganda ahabw’okurugayo bakahereza mukuru weihanga akaruru.
Ishabaramuzi wa Uganda Dr. Flavian Zeija aha shaaha 11.50am zakasheshe yarahiiza Puresidenti Yoweri Kaguta Museveni omu butongore nka Puresidenti weihanga kumara emyaka etano. Ishabaramuzi yamukwasa ebikwato ebyaba birimu egyenderwaho eihanga, egaabo hamwe nebihandiiko ebindi ebigyenderwaho nkakamanyiso kamwe akarikworeka ngu bamuhereza obushoborozi bwokwebembera eihanga.
Omu kurahiira oku Mukuru weihanga yaaba ashendekyerezibwe omuhara kandi ogu gwaaba guri omurundi gwokubanza mukuru weihanga kurahiira ataine mukazi we Janet Kataaha Museveni. Bwanyima yokuheza kurahiira mukuru weihanga yarambura paredi yamahe omurundi gwe ogwokubanza nka mukuru weihanga rya Uganda otoriinwe.
