ABAHWEZI BABA RDCs 300 ABU BATORAINE OMURIMO GWABO NIGUHA?
Buri mwaka gavumenti neija kuba neshohoza sente zirikurenga Sh9.3B ahari ba RDCs
OKUHWEREKYEREZA SENTE ZOMUHI WOMUSHORO OMWIHANGA NIKUGUMIZAMU
Okworekana enkumu hamwe nokwebuza ahu eihanga ririyo niritora nikyo kiri aha mituma yabanya Uganda bwanyima ya Minisita Milly Babalanda aha biiro 20/04/2024 kushohooza orukarara rwabantu 300 abaraije kukora nka bahwezi ba RDCs.
Obwahati eishengyero ryihanga eririkwebemberwa sipiika Anita Among besiire minisita Babalanda kwija akashoborora ekigy’endererwa ky’okuronda abahwezi 300 abarabe nibahwera ba RDCs omu Disiturikiti zitarizimwe nazimwe, nomurimo ogubarabe nibakora wagyeranisa nababaire bariho ekibabaire nibakora.
Oijuke ngu omwishengyero rya Uganda hatwiremu ekiteso eky’okurebuka ngu ebitongore bimwe bya Gavumenti babigaita nkomuringo gumwe gw’okurebuka ngu bakyendeza aha nshohooza eihanga. Ebi bitakahwire, emishoro eibatiire aha bashubuzi nayo ebaire ekwatsire akati ahu abashubuzi namunonga omuri Kampala bamazire ebiiro bakingire amaduka gaabo barikwenda ngu Gavumenti ebashoborere emishoro egi okwerikutwazibwa.
Obwahati ebyo byoona bitakahwire, hati ekya bahwezi 300 abarabe nibahwera ba RDC’s nakyo kyayegaita aha nshonga eziriyo niziteganisa eishengyero ryihanga hamwe nabanya Uganda.
Joel Ssenyonyi orikwebembera orubaju oruhakani omu paramenti eihanga arugireyo yahakanisa eky’okuronda abantu aba ahabw’okuba batwire nibenda ngu bakyendeze kandi nangwa nebitongore ebimwe babigaite nebindi gwenda gavumenti erekye kushohoza sente nyamwingi, kwonka eki noshusha ngu abakuru omu gavumenti tibakufayo.
Joel Ssenyonyi nayenda minisita Babalanda arugyeyo ashoborore eihanga omugasho ogu abahwezi baba RDCs barikuza kukora ogurabe nigukiira aharyogwe ogu abatwireho batwire nibakora? Minisita Babalanda naagira ngu ekigyendererwa kyokutorana abahwezi ba RDCs nokwenda kuhweraho bakama babo kyahiika aha kurwanisa enguzi, okukuratiza puroguramu za gavumenti hamwe nokuronda obushagiki bwa gavumenti.
Enshonga egi eretiire sipika Anita Among nawe yahagira eki orikwebembera orubaju oruhakani, nikwe kushaba Minisita Milly Babalanda oweshonga za puresidenti kwaija omwishengyero akabashoborora oku baronzire abantu abo hamwe nesente ezirikuza kubahebwa ahu zirarugye nokuzirikwingana.
Nobu abanyishengyero barikuhakanisa eki Minisita Babalanda akozire, we David Bahati aijukizie Hon.Joel Ssenyonyi oku paramenti omu mbarira yomwaka 2023/2024 yahingwize sente zokushashura abahwezi baba RDCs omwaka ogu.
Oijuke ngu offisi yomujwekyerwa wa puresidenti omu disiturikiti neija kuba erimu abandi bantu babiri abu batoraine obwahati, ekirikumanyisa ngu offisi yomujwekyerwa wa puresidenti aha disiturikiti neija kuba erimu abakozi baana. Eki nikimanyisa ngu aha disiturikiti nihaija kuba hariho RDC ,omuhwezi we, hamwe nabandi babiri abarabe nibakora nkabahwezi nabo.
Kurugirira aha bihandiiko ebya Gavumenti oku abajwekyerwa ba puresidenti barikushashurwa,nibyoreka oku eihanga ryine ba RDC 147 hamwe nabahwezi 163. Buri kwezi kurugirira aha mbarira yomwaka 2023/2024 ba RDCs nibatunga omushara gwa sh2.2M buri kwezi, ekirikumanyisa ngu omumwaka gavumenti neshohoza sh27.5M buri mwaka ahari RDC omwe. Abahwezi baba RDC bo nibatunga sente zirikwingana sh1.2M ekirikumanyisa ngu omu mwaka gavumenti neba eheraize omuhwezi wa RDC sente zirikwinga Sh15.3M omuntu omwe.
Obwahati Gavumenti yagumizamu nkoku eronzire abahwezi ba RDCs barikwingana 300, nikimanyisa ngu buri mwaka neija kuba neshohoza sente ezirikurenga sh2.9B wagitaho ezaba RDCs abatwireho eki nikimanyisa ngu buri mwaka gavumenti neija kuba nerekura sente zirikurenga omu sh9.3B kushahura abantu abo.
