OKUKWATIRAHO AMASHOMERO GA GAVUMENTI OMURI RWAMPARA,
AMOSI AKANKUNDA AHERAIZE EISHOMERO RYA LAKI HIGH SCHOOL- BUJAGA GYENERETA
Omunyishengyero ahabwa Rwampara Hon. Amos Akankunda nayenda abebembezi ba Rwampara batandikye kukorera hamwe nekigyendererwa kyokutungura Disiturikiti yabo. Ebi abigambire obu abaire naherezayo Genereta ei yaraganise eishomero rya Laki High school- Bujaga eriri kushangwa omugomborora eya Ndeija.
Okuherezayo Genereta egi kukaijaho bwanyima yabashomaire Bujaga kumushaba ahabiiro 8/03/2024 obubaire baineyo ekiterane kyabo kyokutungura eishomero eri. Abashomaire Bujaga bwanyima yokushanga ngu eishomero rikaba ryine ekizibu kyobutagira generato yokubahweraho amashanyarazi garugaho, bakamushaba kwabahwera akabakwatiraho okugura genereta eishomero eyabaire erikuza kumaraho sente zikuhiika omu Miriyooni 10M.
Bwanyima ya Hon Amos kuhurira okushaba kwabo, aba akabaraganisa okwarikuza kugura genereta egi okwakana kutakahwire. Arikuherezayo genereta egi aha rwakatano ebiiro 26/04/2024, Hon Amos agambire abarikwebembera eishomero eri oku sente zirikwingana Miriyoni mwenda nemitwaro makumi abiri ( sh9.2M) nizo ziguzire generate egi erikuza kuba neyasya eishomero ryoona.
Akoragye Edwin ori ceyamani wabashomaire Bujaga asimire emirimo ei Hon. Akankunda arikukorera abanya Rwampara namunonga kyahiika aha kutungura ebyobwegyese. Naagira ngu Hon. Amos nomwe omu bebembezi abakwatireho eishomero rya Laki High school- Bujaga kutunguka.
Nayoreka oku omwebembezi ogu yakozire omurimo muhango obu baibaire nibarundana sente zokwombeka oburaro bwabana babaishiki, ahu obwahati ekizimbe eki kiriyo nikihwa.
Mpirirwe Nzaro ori mukuru weishomero kandi omwe omu bashomaire ahishomero eri, asimire Hon. Akankunda ahabw’okugira omutima gw’okutungura ekyanga kye. Naagira ngu Generata eyabaretiire neija kubahwera munonga ahabw’okuba babaire nibateganisibwa namunonga amashanyarazi gaheza kubura.
