OU BAHIIRE EMPITIRIZO BAMUSIBWIRE,ABASHAHO BAHAMIZE OKU BAMWIHIREMU 50 HAMWE NEBINDI BINTU
Abatuura nibenda kumubinga aha kyaro kandi kooti eshemerire kwija ekamuhozesa aha kyaro nikyo kimwe
Nebya: Ainebyoona Brian
Orikukurira eirwariro rya Mbarara regional hospital Dr .Twesigye Deus ahamize amakuru ag’omwana Akamumpa Samuel owemyaka 9 yobukuru ou mukaishe kuruga omukyaro kya Rweibare ii omuri Kyanzire omu tauni kanso eya Kashenshero Mitooma Disiturikiti yahiire empitirizo hamwe nebicweka by’ekishokokoro byakacumu akabimira.
Turikuganiraho na Dr .Deus omuhango omubyokushemeza omurimo ogu yatandiikire 2008. Atugambire oku abashaho 6 abahangu bakozire omurimo muhango gwokurebuka ngu empitirizo 50 ezabaire ziri omunda yomwana bazimwihamu kandi yasigara ahurire.
Dr Twesigye naagira ngu bakashemeza omwana ogu emirundi ebiri ahabwokuba kubaherize kumushemeza yamara ebiiro biikye kubagarukiire omu sikani kumukyebera bashanga hakirimu empitirizo endaijo. Eki kikabagyemesereza kugaruka kumushemeza ahu bashangire empitirizo ezindi 2 ezabaire zikwatiine. Nayongyera agiira ngu omunda yomwana tibarashangiremu mpitirizo zonka ahabwokuba bakashangamu nebishokonkoro byobucumu obwa Bic ebyabaire bihozahonzire.
Dr. Deus naagira ngu nobu atwire arikushemeza abantu bemiringo myingi abarikuba bamiziire ebintu bitaribimwe nabimwe nangwa abandi nibacumutwa ebintu, kwonka babaire batakatungahoga omuntu wekiika eki.
Obwahati Akamumpa bwanyima y’okumara obwire ari omwirwariro abashaho bamukyebire bashanga nabasa kurya kandi nokuywa nikwe kumusibura. Dr. Deus naagira ngu omwana ngu aine omugisha muhango ahabw’okuba kubataramurahukiize kumureta omwirwariro bakamukoraho, empitirizo zikaba niziza kumucumita amara goona hamwe nokushisha ebindi bicweka by’omunda ekyabaire nikiza kumurugiramu okufa.
Abashaho ahirwariro eri tibakozire ogwokushemeza Akamumpa Samuel kwonka beyongireyo bamurondera abahumuriza hamwe n’abashoho abandi abaragume nibamureba ahabw’okuba akatunga okubonabonesibwa ekirikwetenga ngu babaze bamuhumurize arekye kwijuka ebyo.
Obwahati Juliet Tushabeomwe owemyaka 45 y’obukuru owahikizeho omwana ekikorwa eki poriisi ekamukwata kandi yatwarwa omukooti ahu obwahati ari omukihome ahabwemishango y’obwinazi. Abatuura kuruga omukyaro eki Juliet abaire natuuramu nibenda abebyokwerinda hamwe na kooti eshutame omukyaro eki bahozese Juliet kandi bo barahiire ngu tibaraije kumwikiriza kugaruka omukyaro eki.
