ABANYA UGANDA KUKORESA ESHAAHA 3 Z’OKUBONEZA AHUBARIKUTURA!!
Eki nikiiza kumaraho kasasiro etwire eremire ebitongore bya Gavumenti ???
Govumenti ya Uganda yarangirira oku harikuza kubaho ekihumuro ekyeshaaha 3 buri kweezi nekigyendererwa ky’okuyonja emyanya ei abanya Uganda barikuturamu. Engazi eihanga Hon. Robinah Nabbanja niwe aragirire ebi omu obu abaire nabuganaho abanya makuru aha offisi ye ahu ekiiro kyokubanza kyokuyonja emyanya eibantu barikuturamu kirikuza kutandiika ebiiro 25/07/2026.
Omukoro gwokutongoza eby’obuyonjo niguza kwigurwaho omuhwezi wa mukuru weihanga H.E. Jessica Alupo omuri Kiti Zooni Kisenyi iii omuri Kampara central kutandikana na shaaha 07:00am zakasheshe.
Ekigyendererwa kyokutandiikaho ebyobuyonjo bigyenderire kutungura eby’amagara ahamwe neby’obuyonjo nekigyendererwa kyokurinda ebyobuhangwa hamwe nokumaraho endwara ezirikuretwa oburofa.
Ehururu egi neija kuguma nebaho buri rwamukaga orurikuhendera okwezi kutandiika na shaaha 07:00 zakasheshe kuhisya 10:00zakasheshe. Obwire obwo buri munya Uganda naija kuba naboneza omwanya ogwarikuturamu, emyanya yobutare, amarwariro, amaramiizo enguudo hamwe nemyara erikutwara amaizi.
Kurugirira ahakuconndoza okwakozirwe Minisiture y’ebyamagara omwihanga, nikworeka oku obucweka 75% bwendwara ezirikuteganisa abanya Uganda kandi ezirikutambwa niziretwa oburofa oburikuba buri omu myanya eiturikuturamu namunonga omushwaija gwensiri.
Dr. Chris Byaryomunsi minisita webyamagara naagira ngu okutandiikaho ehururu egi neija kuhwera gavumenti kyahiika aha kurwanisa endwara ezirikuruga omuburoofa. “ okurinda eby’obuhangwa hamwe nokuyonja emyanya eiturikuturamu nikiza kuhwera gavumenti hamwe nabanya Uganda kurwaniisa endwara ezirikuteganisa abanya Uganda”.
Abarikuteera tooki omu byetunguka eihanga, niboreka oku ehururu egi eri nungi kwonka erimu ebituuri byingi ebiraretere etagumizamu. Ekyokureberaho, etauni abantu nyamwingi abarikutura omu ndembo nka Mbarara Kampala, Jinja, Masaka, Hoima, hamwe na Fort Portal nibashashura sente nyamwingi z’okutwara kasasiro kwonka wahiika omu ndembo ezo enyingi zijwiremu oburofa.
Endijo nshonga ei barikworeka nokugiira ngu kasasiro eibarabe nibarundana nooha orikwija kugitwara ahu eshemerire kurundanirwa??
