MUREKYE KUNSISIRA OBWIRE NGU EMIRIMO TERIHO, MUKORESE EMITWE YANYU – MUSEVENI
Okushutama mukategyereza emirimo mukyebwe mwine kureba hare mukahangaho emirimo kutarikutegyereza ebihwaire emirimo
Nasiima Doreen -Fort Portal
Mukuru weihanga ashabire abanya Uganda okwihaho omuze gw’okusiba aha za Radio hamwe na Tv barikugamba ngu emirimo teriho. Naagira ngu okubura ebitekateko byokuhangaho emirimo hamwe nokutandikaho emirimo nikyo kiriyo nikiteganisa abanya Uganda namunonga eminyeto erikusiba aha masimu barikukora busha. Ebi Puresidenti Museveni abigambire ahakishayi kya Omukabura ekirikushangwa omu central divijoni fort portal city ahu ihanga ryona ryayegitira kujaguza ekiiro kyabakozi ekirikubaho buri biiro 01/05 buri mwaka.
Puresidenti Museveni obaire ari omugyenyi mukuru ayorekiire nkoku eminyeto ekirizeyo kukunda kusiiba ahamasimu beitu batarikwenda kwejumbira omubuhingi noburriisa ebyatwiire narangirira bwashesha bwiira. Okugamba ebi mukuru weihanga abaire nagarukamu orikwebembera ekitongore kyabakozi omwihanga, Musa Okello obaire yaheza kugambira puresidenti oku abantu omwihanga batakiine mirimo namunonga abo ababaire nibakora omu misiri hamwe na fakitore zamajani bwanyima yakatare kamajani kugwa.
Okello naagira ngu eki nikyo kiriyo nikiretera abaana baingi baaza omu mahanga agaheru kuronda emirimo kwonka obuzibu oburiho nahabwokushanga ngu baingi kubakuhikayo nibabonabonesibwa. Nayoreka oku emishango erikweyongyera omu kooti kuruga omu bakoozi, obwahati omu kooti za Uganda hariyo emishango erikurenga 1290 ekatakozirweho ahabwabaramuzi kuuba bakye.
Okello nayoreka oku hakiriho okuteganisibwa aha muntu waburaijo namunonga abo abarikutwara emishuburo yaabo omu butare ahabwemishoro eregyeseraize.
Dr. Eng.Syliva Mugisha ceyamani wa federeshoni yabakozi omwihanga naagira ngu nkoku obucweka 75 ahari 100 babakazi, hamwe n’obucweka 82 ahari 100 b’eminyeto nibakora emirimo ya rijarija ekiretiire abantu bayongyera kuba abooro ahabw’okuba tibarikushashurwa kurungi. Oihireho obutashashurwa kurungi, abandi nibatinisirizibwa ahamirimo yaabo kandi nabandi tibeine kibarikubasa kukora kwihaho ekyo.
Mukuru weihanga naagira ngu nobu akatare kamajani omwihanga kafiire omunsi yoona kwonka omutindo gwamajani agarikuruga omwihanga rya Uganda nagwe gukiri mubi munonga. Nikwe kuhamiza abanya Uganda oku gavumenti eriyo nekora ekirikubasika kureba ngu baronda omubazi gwokumaraho ekizibu eki.
Ahamukoro nigwe gumwe habaho okuhereza emidari omubantu abarimu aba poriisi, prisons, nabandi abakoreire ihanga ebirungi.
