HON. MOLLY ASIIMWE NAKWATA NIBIRAGARA ANNAH KANSIIME NAMURAZA MWIZI NA BUGAMBA EBIIRO EBI
Obwahati aiyesigire Mwizi na Bugamba kuba nibo bamuhereza akaruru
Obwe turikuburayo obwire bukye tukaza omukaruru aka NRM akokutorana abarakwatire NRM ebendera omukaruru ka boona . Aka Rwampara akabakyara obwahati kahikiremu omwonyoo buzima. Nobu baingi barugireyo barikworeka oku barikwenda entebe y’omunyishengyero ahabw’omukyara owa Rwampara Disiturikiti, amani obwahati gari ahagati ya Hon. Molly Asiimwe hamwe nowabaire amwesimbireho omukaruru akahwaire Annah Kansiime.
Kurugirira aha myaka etano ei Hon Molly amazire omwishengyero rya Uganda, abanya Rwamapara buzima wabuuza abanya Rwampara emiruundi ei Hon Molly ayemeraire omwishengyero kugamba aha nshonga za Rwampara buzima tiguriho nakakye.
Nobu Hon. Molly ari aha kakiiko keby’obwegyese kandi ari munywani wa minisita weby’obwegyese omukyara Hon. Kataha Janet Museveni, abanya Rwampara tihaine ekibanganyirwemu kyahiika aha kutungura eby’obwegyese omuri Rwampara. Amashomero maingi agari omuri Rwampara gari kubi, kandi Hon.Molly tihaine kihango ekyakozire kushakiira amashomero ago.
ENSHONGA EZIRETIIRE ABANTU BAMUTAMWA.
Enshonga eziretiire abantu ba Rwampara omurundi ogu bagiira ngu habeki nibatekwa kuhereza Annah akaruru nokugiira ngu Hon. Molly akebwa ekyamutwire omwishengyero yatandiika kukora emparana.
Enshonga yokukomesa abantu ababaire nibatunga akasente kuruga omu kutimba omushenyi omu binombe ebirimu ekya Kitwe- Nyamatete, Karora-Rwenshama hamwe na Kakigani ekaretera abantu bayongyera kumutamwa.
Obutakwatanisa nabebembezi ba disiturikiti ya Rwampara, emikoro emyingi akagirekyera Amos Akankunda kyaretera abantu bayebuza ahabweki?
Kuruga nasinga akaruru Hon. Molly akesasira egomborora eya Rugando hamwe na Ndeija yasigara omuri Mwizi hamwe na Bugamba ekiretiire abantu bayebuza ahabweki yahungire owabo ahu arikutura?
Oijuke ngu akaruru aka 2021 aka Molly hamwe na Annah bakamara ebiiro 4 aha disiturikiti ya Rwampara batakarangirire owasinga, ekintu ekyabaire nikyoreka ngu akaruru aka tikarabaire akamaziima.
Obwahati omunyishengyero Molly oburaro akabuhindura yabwiiha Rugando yabutwara Mwizi ahu arikusiba naronda akaruru ekiretiire aba Ndeija na Rugando bahiika naha kurangisa omunyishengyero waabo owabakyara.
