OWA NRM AHUUSIRE AKA KALANGALA!!
Aba NUP Nibetobwaita ahabwokukoresa amahe kwiba akaruuru
Nebya: Nshemereirwe Charity $ Akatukunda Cillia
Kalangala
Owekigombe kya National Resistance Movement [NRM] Aidah Nabayiga niwe arangirirwe nk’osiingire akaruru kentebe y’omukyara omunyishengyero ahabwa Kalangala Disituriki. Eki nikijaho bwanyima y’okugarukamu kutera akaruru aka ahu omunyishengyero ou babaire baronzire Hellen Nakimuli kufa.
Ronald Agaba obaire akurire okuteeza oburuuru omu disiturikiti ya Kalangala arangiriire Nabayiga aha shaaha 8 nedakiika 53 zakasheshe nk’omusinguzi obwe arikwihayo oburuuru 12,642. Obiire omwesimbireho, Irene Nampala ow’ekibiina Kya NUP aizire ari owa Kabiri aine oburuuru 7474. Obaire ayesimbire ataine kigombe kyoona Sarah Babirye akuratsireho nobururu 244, Hellen Flavia Nagawa ayihireyo oburuuru 217 kandi Agnes Nasuuna niwe ashembire n’oburuuru 34.
Oburuuru bwona obutairwe bubaire buri 21,038 oburugiire omu bateezi b’akaruuru aha myanya 115 ei barikutereramu akaruuru. Aha buruuru 21038 obutairwe, 427 bufiire kandi obukongi 67 nibwo busisikeire.
Simon Byabakama orikukurira eby’oburuuru omwihanga agambire ababeire besimbire hamwe n’abateezi b’akaruuru okuguma beine obusingye obwo baaba nibateera akaruuru. Ayorekiire oku batashangiremu buziibu bwona kandi asimiire ababeire besimbire hamwe n’abateezi b’akaruuru okugira obusingye omu karuuru.
Nabayiga osingire akaruuru ogu gubaire guri omurundi gwa kashatu arikwesimba ahu omurundi gwokubanza yasingire akaruuru aka nikwe kuza omwishengyero. Omu 2021 akagaruka yayesimba nikwe Nakimuli Hellen owekigombe kya NUP kumusinga. Omurundi ogu agarukiire namani nikwe kusinga akaruuru omurundi gwe gwakabiri.
Nabayiga agambire ngu naaza kutamu amaani kandi agarureho obumwe omu bantu ba Kalangala. Bwanyima y’okurangirira ebirugire omu karuuru obeire ayetsimbire ahabw’ekibiina kya NUP Irene Nampala na timu ye bahakaniise ebirangirirwe obwe barikugira ngu bamwe aha bahagizi be bakabingwa poriisi batakarangireire akaruuru.
Ayongire yayoreka oku obicweka ebimwe nka Kyamuswa, obukongi obumwe bukaba niburenga abateezi b’akaruuru abari omu regyesita, ekirikworeka ngu akaruru aka bakibire.
