OKUTUNGURA EBY’OBURAMBUZI: ABANYAMAKURU BATENDEKIRWE

Ekitongore ekirikurinda enyamaishwa z’omukishaka ekya Uganda Wild Authority (UWA) kibangwire abanyamakuru ba Burengye rwizooba oku bakubasa kuhandiika amakuru agakwasiire aha marindiiro g’enyamaishwa hamwe nabantu abetorire emyanya ya paaka  

Okubangura abanyamakuru kutandiikire nokubashomesa aha biragiiro ebirikutegyeka amarindiiro genyamishwa omwihanga ryoona kandi omushomo ogu gubaire aha hoteri eya Perikan omu rurembo orwa Mbarara.

Lauben Ngene omuhababi kandi omutonganirizi wa UWA kuruga omwirindiro ryenyamishwa erya Queen Elizabeth National Park, naagira ngu ebiragiiro ebirikukwata aha marindiro genyamishwa omwihanga bikatandiika omu 1996 kwonka omu 2000 baija bahinguza eiteka eryabaire niryebembera paaka zoona.

Nobu bahingwize ebiragiiro ebyo bakaija bashanga ngu hakaba harimu bimwe ebyabaire nibiburamu nikwe kugarukamu bakakora amateka agandi agu mukuru weihanga yahingwize ebiiro 27/09/2019 agu barikugyenderaho obwahati.

Lauben ayorekiire abanyamakuru ebiragiiro ebi eishengyero rya Uganda ryahingwize nekigyendererwa kyokubahwera baba nibakora emirimo yaabo namunonga kyahiika aha kukwata abo abarikutahirira paaka omubihenda birangiiro hamwe nokushumbusha abo  abarikuba baferirwe ebintu byabo bwanyima yenyamishwa kubatahirira.

Kisaame Fredrick Elia orikwebembera eirindiro ryenyamishwa erya Lake Mburo national Park naagira ngu abanyamakuru nibakora omurimo muhango kyahiika ahakumanyisa ensi yoona ebirungi ebirikuba nibikorerwa omu marindiro genyamishwa omwihanga rya Uganda.

Kisaame naagira ngu sente ezibarikurundana kuruga aha barambuzi zihwerire munonga disiturikiti ezirikwatana na lake Mburo. Obwahati obucweka 45% bwa sente ezibarikurundana nizigaruka omu bantu abaheraire paaka obwe barikubombekyera amashomero, okubatendeka.

Aha nshonga yokushashura abo abu enyamishwa zirikuba zisisire ebintu byabo, orikwebembera lake Mburo  Kisame Fredrick ashoborire abanyamakuru oku hariho emitendero ei omuntu Weena aine kukuratiira yaaba aine okwetombwita. Naagira ngu enyamishwa yakusisira ebihingwa byawe ninga ekaita amatungo ninga omuntu, nikirungi kumanyisa abarikurinda enyamishwa ezo kwija bakareba ekyabaho. Eki nikibahwera kukora rwipota erikuhwera ogwe waferwa ebintu bye kutunga enshubushano.

Abanyamakuru abetebire omukutendekwa oku batungire oruramburo rwa busha rw’okuza omwirindiro ryenyamishwa erya Lake Mburo ahu babasiize kwerebera enyamishwa zitarizimwe nazimwe okuzirikutura hamwe nokubuza abarikurinda enyamishwa ezo ebibuzo bitaribimwe nabimwe nekigyendererwa kyokwetegyereza.