AKASHEKO KA RWAMPARA KAGARUKA- ANNA EKYAKOZIRE MOLLY!!!!
Annah asingise Molly obururu5983
Burikushesha eraizoba 18/07/2025 abarya Rwampara Ruhanga yahurira eshaara zaabo nkoku batwire nibashaba. Anna Kansiime niwe yasinga aka NRM obwe arikusinga Molly Asiimwe otwire ari omunyishengyero ahabwa bakyara ba Rwampara. Aha shaaha ikunemwe burikushesha orikwebembera ebyokuteza akaruru omuri Rwampara Mutahi Jackson yaragirira Annah Kansiime nkowasinga akaruru obwe arikwihayo obururu 26347 kandi Molly yatunga obururu 20364 reru Komugisha Esananse yatunga 852.
Kansiime Annah asingise Molly Asiimwe obururu 5983 oburikukora ebicweka 55.4% reru Molly Asiimwe yatunga 42.8% reru Komugisha yatunga 1.7%. Okusinga kwa Anna Kansiime kugarwire abantu ba Rwampara akasheko aha matama ahabw’okuba emyaka etaano ehwireho nabwe Annah akaba asingire konka bamwiba. Abantu ba Rwampara okusharamu bakahereza Annah akaruru nahabwokushanga ngu Molly kuyagiire omwishengyero yayebwa abamuhaire akaruru kubakorera yatandiika kurwana naabo.
Akabashaija Amos Kankunda niwe asingiire abandi obwe arikwihayo obururu 9022 reru Elly Kasigaire yatunga 5162, Zabashaija 3593, Amanya 2944 reru Turinayesu yatunga 2012.
ENSHONGA EZIRETIIRE ABANTU BAMUTAMWA MOLLY ASIIMWE.
Enshonga eziretiire abantu ba Rwampara omurundi ogu bagiira ngu habeki nibatekwa kuhereza Annah akaruru nokugiira ngu Hon. Molly akebwa ekyamutwire omwishengyero yatandiika kukora emparana.
Enshonga yokukomesa abantu ababaire nibatunga akasente kuruga omu kutimba omushenyi omu binombe ebirimu ekya Kitwe- Nyamatete, Karora-Rwenshama hamwe na Kakigani ekaretera abantu bayongyera kumutamwa.
Obutakwatanisa nabebembezi ba disiturikiti ya Rwampara, emikoro emyingi akagirekyera Amos Akankunda kyaretera abantu bayebuza ahabweki? Kuruga nasinga akaruru Hon. Molly akesasira egomborora eya Rugando hamwe na Ndeija yasigara omuri Mwizi hamwe na Bugamba ekiretiire abantu bayebuza ahabweki yahungire owabo ahu arikutura?
Oijuke ngu akaruru aka 2021 aka Molly hamwe na Annah bakamara ebiiro 4 aha disiturikiti ya Rwampara batakarangirire owasinga, ekintu ekyabaire nikyoreka ngu akaruru aka tikarabaire akamaziima.
