ENSHONGA 5 EZIRETIIRE HON. MOLLY ASIIMWE YARUGA OMUKARURU

Nebya: Ainemukama Dan

Hon Molly Asiimwe otwire ari omukyara omunyishengyero arikujwekyera abakyara ba Rwampara Disiturikiti, arekuriire Annah Kansiime kuba niwe yaaza omwishengyero nobu abaire amwesimbireho nkotaine kibiina  bwanyima yokumusinga omu karuru akahwaire aka NRM.

Okurekura kwa Hon. Molly Asiimwe kwizireho omu bwire bukye mukuru weihanga arugiire omu disiturikiti ya Rwampara kuronda obushagiki, ahu yakwasize Annah Kansiime ebendera omubutongore, ahu yagambire Hon Molly ngu kwarabe ari omurokore ajunwe arekye kutagura ekibiina kya NRM.

Omukyara wa Mukuru weihanga Janet Kataaha Museveni akaija yagiraho ekiganiiro na Molly Asiimwe ahari Irenga State Lodge omuri Ntungamo, ekirugiriremu Molly Asiimwe kurekura. Aha rwakashatu ebiiro 10/12/2025 Molly Asiimwe akakora omukoro gwokurekura omu butongore ahu omuhwezi wa sipiika weishengyero Thomas Tayebwa niwe yabaire ari omugyenyi mukuru. Molly akoreka aku obwire bubaire buhikire kurekurira Annah Kansiime ahabwoburungi bwekibiina kya NRM.

Omu bigambo bya Molly ayorekiire oku puresidenti atarikwija kucwamu Rwampara ahabwe na Annah. “Nkomuntu ojunirwe kandi orikukunda ekibiina kya NRM, nyetiire omu kifuuba najunwa nasharamu kuhereza Annah omugisha nawe ayebembere. Okubahereza niza kuguma nimbakorera nobu ntari munyishengyero wanyu” Hon Molly omubigambobye.

Nobu Molly arikwekwatsa ngu arekurire Annah Kansiime kwonka aha mutiima ebintu bibaire byamushobire kureka arikwehangana. Zimwe aha nshonga 5 eziretiire Molly Asiimwe zamusindiika aha kisiika akarekura harimu;

1. OBUTAKWATANISA NABEBEMBEZI BA RWAMPARA; Kuruga atunga obwebembezi bwokujwekyera abakyara ba Rwampara omwishengyero omu 2021 ahu amaziire emyaka 5, Hon Molly eby’okukwatanisa nabebembezi ba Rwampara akahiika yabiita aha rubaju ahu obwire obwingi abaire narebuka aha mikoro obumwe wenka. Eki kikaretera bamwe batandiika kumwihamu obwesigye.
2. ENSHONGA Z’OMUSHENYI GWA KINONI, KARORA, NYARUBUNGO; Hon Molly abantu okumwihamu obwesigye namunonga abegomborora eya Ndeija hamwe na Rugando nahabwokwetasya omunshonga zomushenyi ahu yabaire nayoreka ngu ebyobuhangwa byahwerekyerera. Ekyarugiriremu abantu yamwingi bakabakoma abanda emirimo yabahwaho kyaretera obushagiki bwahwaho.
3. OKUBURA BURA OMU KIIKO HAMWE NEMIKORO OMURI RWAMPARA; Nobu abaire ari omukyara orikujwekyera abakyara ba Rwampara, Hon. Molly Asiimwe emikoro emyingi namunonga ei babaire nibamwetamu, abaire nabura kwija kiretera abateezi ba karuru basigara nibebuza. Reru kukyahikire aha magomborora nka Ndeija hamwe na Rugando okwe akahebwa washusha ngu naruga Bugamba ninga Mwizi ahu abaire nasiiba.
4.  OKUMUSINGA OMU KARURU KA NRM; Baingi babaire nibamanya ngu Molly n’omuntu wa NRM hamwe na famire yamukuru weihanga  owomunda kandi ekyarikugamba nikikorwa. Kwonka ekyatagariize buryomwe nobu akaruru ka NRM kamusinga akagyezaho kukora ekirikubasika ngu akiibe nabyo bikanga abantu bakaremeraho.
5. MUKURU WEIHANGA OKUGAMBIRA NGU AZE AHA RUBAJU; okurekura kwa Molly nibwanyima ya mukuru weihanga kumurugamu aha shaaha yahamuheru obu yabaire ari aha kishayi kya Bujaga akamugiira ngu arekye kutagura ekibiina. Eki kikaretera abahagizi ba Molly bahwa amani ahabwokuba bakaba nibamanya ngu mukuru weihanga naija kumugambaho ebirungi byonka.

Annah omu bigambo bye asimire Hon.Molly Asiimwe ahabwokuhereza ekitinisa egyenderwaho yekigombe kya NRM akamurekurira.

Oijuke ngu bwanyima y’okuteera akaruru kabanyishengyero ebiiro 17/07 2025 omuri Rwampara, akabakyara kakazamu obutikirizingana ahu Molly Asiimwe atwire ari omunyishengyero ahabw’abakyara akahakaniisa ebyarugiire omu karuru arikugiira ngu bakarangirira otariwe. Eki kikaretera Annah Kansiime owabaire asingire akaruru aka yirukagiira omukakiiko ka NRM tribunal nekigyendererwa ky’okumanya nooha owasingire akaruru.

Akakiiko kakashanga ngu aha polling station 231 ahari 243 ezabaire ziri omuri Rwampara ezi bashijumire bashangire ngu Annah Kansime akaba asingire nobururu 25773 kandi Molly aine 18474, ekirikworeka ngu akamusingisa obururu 7299.

Obwahati Annah Kansiime naija kuritaana na Sarah Kiconco owekigombe kya NUP obwahati ori omukihome Mbarara bwanyima yokukwatwa nabandi 37 ebiiro 07/11/2025 obu Kyagulani yabaire naronda akaruru omuri Mbarara city